දකුණු යේමනයේ ඒඩින් නගරය හරහා යේමනයේ ආරක්ෂක ඇමැති මොහොමඩ් නසාර් රැගත් රිය පෙළක් පෙරේදා (27) ගමන් ගනිද්දී එය මැදට බෝම්බකරුවකු සිය වාහනයෙන් කඩාවැදී  බෝම්බයක් පුපුරුවා ගෙන ඇතත් ආරක්ෂක ඇමතිගේ ජීවිතය බේරී ඇත්තේ අනූ නවයෙනි. ඇමැති නසාර්ගේ ජීවිතයට මසක් ඇතුළත එල්ල වූ දෙවැනි ප‍්‍රහාරය මෙය වේ. මෙම ප‍්‍රහාරය පිටුපසින් සිටින්නේ අල් කයිඩා සංවිධානය බව පොලිසිය සැක කරයි. මෙම මරාගෙන මැරෙන බෝම්බ ප‍්‍රහාරය නිසා රිය පෙළෙහි ඉදිරි වාහනයේ ගමන් ගත් සත් දෙනෙකු තුවාල ලැබූහ. මේ අවස්ථාවේ ආරක්ෂක ඇමැති නසාර් ගමන්ගෙන ඇත්තේ දෙවැනි රිය තුළය. මෙම බෝම්බය දුරස්ථ පාලකයක් උපයෝගී කරගෙන පුපුරවා හරින්නට ඇතැයි මුලදී සිතූ නමුත්, පුපුරා ගිය රිය තුළ තිබී තරුණයෙකුගේ මළසිරුරක් හමුවීමෙන් පසු මෙය මරාගෙන මැරෙන වැඩක් බව හෙළිවී තිබේ. මෙකී බෝම්බ පිපිරවීම ගැන පරීක්ෂණ පැවැත්වූ ආරක්ෂක අංශ කියා සිටින්නේ, යොදාගෙන ඇති පුපුරණ ද්‍රව්‍ය හා ආකාරය පරීක්ෂා කිරීමේදී එය අල්කයිඩා ප‍්‍රහාරයක් බව නිසැකවම කිව හැකි බවයි. බෝම්බය පුපුරා යාමෙන් පසු රිය පෙළෙහි වාහනයක්ද ගිනිගෙන දැවුණු බව මෙම සිද්ධිය ඇසින් දුටුවෙක් පැවසීය. යේමනයේ ජනාධිපති අලි අබ්දුල්ලාට විරුද්ධව ජනතා රැල්ලක් හට ගත්තේ මේ වසර ආරම්භයේදීමය. මේ අතරතුර අල්කයිඩා සංවිධානය හා සබඳකම් ඇති ඉස්ලාමීය තරුණ කොටස් ආරක්ෂක අංශ ඉලක්ක කරගෙන දකුණු යේමනය තුළ ප‍්‍රහාර වැඩිකර ඇත.