මෙක්සිකෝවේ මෙක්සිකෝ සිටි නගරය සහ දකුණු ගුඑරෝ පළාත ඊයේ (11) රික්ටර් මාපකයේ ප‍්‍රබලත්වය ඒකක 6.5ක් සටහන් කළ භූමි කම්පාවකින් දෙදරා ගිය අතර එයින් පුද්ගලයින් දෙදෙනෙකු ජීවිතක්ෂයට පත් වූහ. ඉගුවානා නගරයේ එකොළොස් වියැති දරුවෙකු සහ තවත් අයෙකු භූ කම්පනයෙන් ජීවිතක්ෂයට පත්ව ඇත. භූ කම්පනයෙන් පසුව අගනුවර ප‍්‍රදේශ කිහිපයක විදුලිබල සැපයුම අඩාල වූ බවත් දුරකථන සන්නිවේදන පද්ධතිය ඇණහිටි බවත් වාර්තා වේ. භූ කම්පනයෙන් පසුව ප‍්‍රකාශයක් නිකුත් කළ මෙක්සිකෝවේ ජනපති ෆිලිප් කල්දෙරන් කියා සිටියේ මේවන විට භූ කම්පනයෙන් බරපතළ හානියක් සිදු වූ බවට වාර්තා වී නොමැති බවයි. මෙක්සිකෝ සිටි නගරයට කිලෝමීටර් 166ක් ගිනිකොණ දෙසින් පිහිටි කිලෝමීටර් 65ක් පොළොව අභ්‍යන්තරයෙහි භූ කම්පනයේ අපිකේන්ද්‍රය පිහිටා ඇතැයි භූ විද්‍යාඥයෝ පවසති. මෙක්සිකෝව පැසිෆික් ගිනිවළල්ල ආශි‍්‍රතව පිහිටා ඇති රටක් නිසා නිරතුරු භූ කම්පන ඇති වීමේ අවදානම පවතින අතර 1985 වසරේ දී එරටට බලපෑ රික්ටර් මාපකයේ 8.1ක දරුණුම භූ කම්පනයෙන් පුද්ගලයින් දසදහසක් පමණ ජීවිතක්ෂයට පත් වූහ.