වසර 13කට පෙර, ඩයිනමයිට් සහ මෝටාර් තුවක්කු උපයෝගී කරගෙන විනාශ කර දැමු  බාමියන් බුද්ධ ප්‍රතිමා වහන්සේ පිළිබඳව, ඇෆ්ගනිස්ථානයේ සිට ඕස්ට්‍රේලියාවට පැමිණි වයස අවු 80ක් ඉක්මවූ සරණාගත කාන්තාවක් පැවසුයේ එම ප්‍රතිමා වනසද්දී ආහාර පවා නොගත් බවයි.

 ඇය ඇතුලු පවුලේ අය  ඇෆ්ගනිස්ථානයේ බාමියන් බුද්ධ ප්‍රතිමා වහන්සේට වැදුම් පිදුම් කර ඇති බවත්, එය නතර කළේ ඇයගේ වයස අවු විසි ගණන් වලදී බවත්, පසුව තමන් අප්‍රසිද්ධියේ තම මිත්තනිය සමග තම නිවසේදී  බෞද්ධ වැදුම් පිදුම් කළ බවත් ඇය කියා සිටියාය.

 ඇෆ්ගනිස්ථානයේ බාමියන් බුද්ධ ප්‍රතිමා වහන්සේ  විනාශ කළ දිනවල තමන් ඇතුළු පවුලේ අය නිරාහාරව සිටි බවත්, ඕස්ට්‍රේලියාවට පැමිණි පසුව නිදහසේ බෞද්ධ කටයුතුවල යෙදෙන බවත් දැනට ඇය වියට්නාම් භික‍ෂූණියක් සමග භාවනා කටයුතු කරගෙනයන බවත් ඇය  කීවාය.

ලෝක බෞද්ධයාගේ ගෞරවාදරයට ලක්ව තිබූ, පස්වන ශතවර්ෂයේ දී පමණ ගන්ධාර කලාවට අනුව නිර්මාණය කළ, අඩි 175 පමණ උසකින් යුත්, ඇෆ්ගනිස්ථානයේ බාමියන් බුද්ධ ප්‍රතිමා වහන්සේව, ලෝක නායකයන්ගේ ඉල්ලීම් පවා තුට්ටුවකටවත් මායිම් නොකොට, අන්තවාදී ඉස්ලාම් මූලධර්මවාදීන්ගේ බලපෑම මත විනාශකර මාර්තු මස 11 වන දිනට හරියටම වසර 13කි.