බාබර් කතුර විසිකරයි : කඩුව අතට ගනී

කතුරට ඇති තැන කඩුවට දී ඇති කරණවෑමියෙකි වියට්නාම ජාතික න්ගුයෙන්ග් හෝඇන්ග් හුන්ග්.

ඔහුගේ කරණවෑමි සාප්පුවට පැමිණෙන්නන් ගේ කොණ්ඩය කැපෙන්නේ හුන්ගේ අත ඇති සමුරායි කඩුවකිනි.කඩුවක් අත තිබුණේ යැයි කියා හුන්ග් උමතුවෙන් නොහැසිරෙන අතර මනා සංයමයකින් කඩුව හසුරුවන ඔහු අපූරුවට කොණ්ඩය කපා දේ.

තමා කඩුවකින් කොණ්ඩය කැපීමට උගත්තේ මීට වසර 4 කට පමණ පෙර සහභාගී වූ කුසලතා පෙන්වීමේ තරගයකින් පසු බව හුන්ග් කියයි.එම තරගයේදී හුන්ග්ට කතුරක් හෝ වෙනත් කොණ්ඩා කපන උපකරණයක් හෝ නොමැතිව පුද්ගලයෙකුගේ කොණ්ඩය කපා පෙන්වන්නැයි අභියෝගයක් ඉදිරිපත්ව තිබෙන අතර එහිදී අත් කියතක් භාවිතා කරමින් හුන්ග් එම පුද්ගලයාගේ කොණ්ඩය කපා ඇත.

මෙයින් පසු කඩුවකින් කොණ්ඩය කැපිය හැකිදැයි සොයා බැලු බවත් වසර ගණනක් උත්සාහ කිරීමෙන් පසු දැන් කතුරකින් කපනවාටත් වඩා හොදින් කඩුවෙන් කොණ්ඩය කැපිය හැකි බවත් ඔහු කියයි.

හුන්ගේ සාප්පුවට පැමිණෙන්නවුන්ගේද ඉහළ යෑමක් දක්නට තිබෙන අතර ඔවුන් කියන්නේ කතුරකින් කැපූ කොණ්ඩයකට වඩා වැඩි පෙනුමක් කඩුවෙන් කැපූ කොණ්ඩයට තිබෙන බවයි.මේ බව හුන්ග්ද පිළිගනී.

හුන්ග් කොණ්ඩය කැපීම සදහා භාවිතා කරන කඩුව 15 වැනි සියවසේදී ජපාන සමුරායිවරුන් අතර ජනප්‍රිය අවියකි.සතුරා හා මුහුණයට මුහුණ සටන් වලට යොදා නොගත්තද මුවහත ඉතා තියුණු නිසා ඉක්මන් පහරදීම් හා හිස ගසා දැමීම් ආදියට මෙම කඩුව යොදාගෙන ඇතැයි සදහන්ය.

සමුරායිවරුන් එසේ කළද හුන්ග් නම් එසේ නැත.හිස ගසා දැමීමට හෝ පහර දීමට අවශ්‍යතාවක් නැති ඔහුගේ එකම අරමුණ තම පාරිභෝගිකයින්ගේ කොණ්ඩා අලංකාරව කපා දීම පමණි.