ඇමෙරිකා එක්සත් ජනපදයේ ආරක්ෂක දෙපාර්තමේන්තුව වන පෙන්ටගනයට වෙන් කර ඇති මුදල්වලින් ඇමෙරිකාව සහ මෙක්සිකෝව අතර තාප්පය ඉදි කිරීමට හැකියාව ඇතැයි එරට ශ්‍රේෂ්ඨාධිකරණය සඳහන් කළේය.

පෙන්ටගනය වෙනුවෙන් ඇමෙරිකානු ඩොලර් බිලියන 2.5ක මුදලක් වෙන් කර ඇති අතර එම මුදලින් ඇමෙරිකානු - මෙක්සිකානු දේශසීමාවේ තාප්පය ඉදි කළ හැකි බව ශ්‍රේෂ්ඨාධිකරණ විනිසුරුවරු තීරණය කළහ. ඇමෙරිකා එක්සත් ජනපදයේ ශ්‍රේෂ්ඨාධිකරණ විනිශ්චය මණ්ඩලය විනිසුරුවරුන් නවදෙනකුගෙන් සමන්විත වන අතර මෙම තීරණයට පක්ෂව විනිසුරුවරු පස්දෙනෙක් තීන්දු දුන්හ.

දේශසීමා තාප්පය ඉදිකිරීම වළක්වමින් කැලිෆෝනියා ප්‍රාන්තයේ ෆෙඩරල් විනිසුරුවරයකු තීන්දුවක් දුන් අතර එම නිසා තාප්පය ඉදි කිරීමේ ක්‍රියාවලිය අතරමැද නැවැතුණි.

ඇමෙරිකා එක්සත් ජනපදය සහ මෙක්සිකෝව වෙන් කරමින් දේශසීමාවේ තාප්පයක් ඉදි කරන බව ජනාධිපති ඩොනල්ඩ් ට්‍රම්ප් මහතා දිගින් දිගටම අවධාරණය කළ අතර එය 2016 ජනාධිපතිවරණය සමයේදී ඔහු දුන් ප්‍රධාන පොරොන්දුවක් විය.

තාප්පයක් ඉදි කිරීමේ ට්‍රම්ප්ගේ තීරණයට ඩිමොක්‍රටික් පක්ෂයෙන් දැඩි විරෝධයක් එල්ල වී තිබේ. 

ශ්‍රේෂ්ඨාධිකරණ තීන්දුවට අනුව කැලිෆෝනියා, ඇරිසෝනා සහ නිව් මෙක්සිකෝ ප්‍රාන්තවල තාප්පය ඉදි කිරීම සඳහා එම මුදල් භාවිත වනු ඇත. 

තාප්පය ඉදි කිරීම සඳහා මුදල් භාවිත කළ හැකි යැයි කොංග්‍රසය නිසි පරිදි අනුමැතිය ලබා දී නැතැයි කැලිෆෝනියා අධිකරණය ට්‍රම්ප් තීරණයට විරුද්ධව තර්කයක් ඉදිරිපත් කළේය.

(ඒ.එෆ්.පී. සහ බී.බී.සී. ඇසුරිනි)  

 055