උතුරු පාකිස්තානයේ ගමන් කරමින් තිබූ බස් රථ කිහිපයක් නැවතූ යුද සෙබළුන් ලෙස වෙස්වලාගත් අන්තවාදී ආගමික අදහස් දරන පිරිසක් පෙරේදා(28) එම බස් රථවල සිටි ෂියා මුස්ලිම් ජාතිකයන් 18 දෙනකු අමානුෂික ලෙස ඝාතනය කර ඇතැයි වාර්තා වේ. තලෙයිබාන්වරුන්ගේ කඳවුරු පිහිටා තිබූ ස්වාට් නිම්නයට ආසන්නයේ පිහිටි කොහිස්තාන් දිස්ති‍්‍රක්කයේදී මෙම ඝාතනය සිදු කර ඇති බවත් එම සිදුවීමට වගකිවයුත්තෝ කවුරුද යන්න නොදන්නා බවත් ප‍්‍රාදේශීය පොලිස් ප‍්‍රකාශකයෙක් පැවසීය. පොලීසිය පැවසුවේ මාර්ගයේ ගමන් කරමින් තිබූ බස් රථ නැවතූ අන්තවාදීන් එහි ගමන් ගත් පිරිස් එයින් බස්වා ෂියා සහ සුන්නි මුස්ලිම්වරුන් වෙන වෙනම හඳුනා ගෙන අනතුරුව ෂියා මුස්ලිම්වරුන් ඝාතනය කළ බවයි. මෙම ප‍්‍රචණ්ඩකාරී සිදුවීමෙන් අනතුරුව පුද්ගලයන් අට දෙනෙක් තුවාල ලබා ඇත. රාවල්පිණ්ඩි නගරයේ සිට ගිල්ගිට් නගරය දක්වා ගමන් කරමින් තිබූ බස් රථ තුනක් මෙම අවාසනාවන්ත සිදුවීමට මුහුණ පා ඇත. මෙම සිදුවීමත් සමඟ පාකිස්තානය තුළ වෙසෙන බහුතරයක් වන සුන්නි ජාතිකයින් සහ සුළුතරයක් වන ෂියා ජාතිකයන් අතර නිතර ඇතිවන අන්තවාදී ගැටුම් උත්සන්න වීම සම්බන්ධයෙන් එරට රජයට මානව හිමිකම් කි‍්‍රයාකාරීහු චෝදනා කරති.