ශුද්ධෝත්තම ෆ‍්‍රැන්සිස් පාප්තුමන්ගේ ප‍්‍රථම දේව මෙහෙය ඊයේ (19) රෝමයේ වතිකානයේ ශාන්ත පීතර් චතුරස‍්‍රයේදී පැවැත්වුණු අතර දෙස් විදෙස් කිතුනු බැතිමත්හු දහස් ගණනක් එම අවස්ථාවට සහභාගී වූහ.
පාප් පදවියට පත් වීමෙන් පසු පාප්තුමා පවත්වන පළමු දේවමෙහෙය එතුමන්ගේ පදවිප‍්‍රාප්තිය ලෙස ද සැලකෙයි.
දේව මෙහෙය ඉතා චාම් අයුරින් පැවැත් වුණේ නව පාප්තුමන්ගේ උපදෙස් අනුවය.
වතිකාන මාධ්‍ය වාර්තා කළේ රාජ්‍ය නායකයන් සහ නියෝජිතයන් 130 දෙනකු දේව මෙහෙයට සහභාගී වීමට පැමිණ සිටි බවය.
එම පිරිස අතර ඇමෙරිකානු උප ජනාධිපති ජෝ බයිඩන් මෙන්ම ලතින් ඇමෙරිකා රාජ්‍යයක් වන ආජන්ටිනාවේ ජනපතිනී කි‍්‍රස්ටිනා ෆර්නෑන්ඬේස් ද සිටියහ.
අභිනවයෙන් පාප් පදවියට පත් වූයේ ආජන්ටිනාවේ බුවර්නෝස් අයර්ස් නුවර අගදරගුරු වූ     76 හැවිරිදි ජෝර්ජ් මාරියෝ බර්ගොග්ලියෝ ය.
පාප් පදවියට ලතින් ඇමෙරිකානු රටකට පිරිනැමුණු ප‍්‍රථම අවස්ථාව මෙය වන අතරම යුරෝපයෙන් බැහැර රටකට හිමි වූ ප‍්‍රථම අවස්ථාව ද මෙය වෙයි.
දුප්පතුන් වෙනුවෙන් කැපැවී කටයුතු කරන කළ අයකු ලෙස ප‍්‍රකට නව පාප්තුමන් චාම් දිවියක් ගත කරන්නකු වන අතර තම ආහාර තමා විසින්ම සකසා ගනී. පාප් ධුරයට පත් වීමෙන් පසු එතුමන්ට හිමිවූ ලිමොසීන් නිල රථය පවා එතුමන් ප‍්‍රතික්ෂේප කළ බව මාධ්‍ය වාර්තා කළේය.
ජේසුතුමන්ගේ ධර්මයේ මූලික ප‍්‍රතිපත්ති අනුව කටයුතු කිරීමටත් දුප්පතුන් වෙනුවෙන් කැප වී කටයුතු කිරීමටත් කතෝලික පල්ලිය මෙන්ම කතෝලික සභාව කටයුතු කළ යුතු යැයි පාප් පදවියට පත් වීමෙන් පසු එතුමන් අවස්ථා ගණනාවකදී පවසා ඇත.