සිර දඬුවම් විඳිමින් සිටින පාකිස්තානයේ හිටපු අග්‍රාමාත්‍ය නවාස් ෂරීෆ් ඇප ඉල්ලමින් කරන ලද අභියාචනය එරට අධිකරණයක් විසින් අද (25) ප්‍රතික්ෂේප කරනු ලැබීය. 

සෞදි අරාබියේ වානේ කර්මාන්තශාලාවක හිමිකාරීත්වය සනාථ කිරීමට නොහැකි වීම ඇතුළු වංචා දූෂණ චෝදනා කිහිපයක් හේතුවෙන් පාකිස්තානයේ හිටපු අග්‍රාමාත්‍ය නවාස් ෂරීෆ් මේ වනවිට වසර හතක සිර දඬුවමක් විඳිමින් සිටී. 

හිටපු අග්‍රාමාත්‍යවරයා වෛද්‍ය ප්‍රතිකාර ලබාගැනීම සඳහා රෝහල් ගත වී තිබෙන අතර ඔහුගේ සෞඛ්‍ය තත්ත්වය සඳහන් කරමින් අදාළ අභියාචනය ඉදිරිපත් කර ඇත. 

හිටපු අග්‍රාමාත්‍ය නවාස් ෂරීෆ්ගේ සෞඛ්‍ය තත්ත්වය ඇප ගැනීමට තරම් හේතුවක් නොවන බවත් ඔහුට අවශ්‍ය සියලු වෛද්‍ය පහසුකම් රෝහලේ තිබෙන ඇප අයඳුම්පත ප්‍රතික්ෂේප කරමින් අධිකරණය සඳහන් කළේය.

අධිකරණ තීන්දුවෙන් තමන් කනගාටුවට පත්වන බව නවාස් ෂරීෆ්ගේ සමීපතමයකු සහ පාකිස්තානයේ හිටපු අග්‍රාමාත්‍යවරයා වන ෂහීද් කඛාන් අබ්බාසි පැවැසීය.  “අපි මේ තීරණයෙන් කනගාටුවට පත්වෙනවා. එහෙත් අපේ පක්ෂය මේ තීන්දුවට ගරු කරනවා. අපි හැමවිටම අධිකරණ තීන්දුවලට ගරු කරනවා. ඉදිරියේදී අපි ගත හැකි සියලු නීතිමය පියවර ගන්නවා” යැයි හෙතෙම කීය. 

වංචා දූෂණ, ආදායම් උපයාගත් ආකාරය හෙළි කිරීමට නොහැකි වීම යනාදි චෝදනාවලට වරදකරු කරමින් පාකිස්තානය ශ්‍රේෂ්ඨාධිකරණය 2017 වසරේ ජූලි මාසයේදී හිටපු අග්‍රාමාත්‍ය නවාස් ෂරීෆ් එම ධුරයෙන් ඉවත් කළ පාර්ලිමේන්තු මන්ත්‍රී ධුරය දැරීමට නුසුදුසු යැයි ද තීරණය කළේය. 

රොයිටර් ඇසුරිනි 

055