ත්‍රස්තවාදයට එරෙහිව නැඟී සිටිති

ආගම හා ජාතිය උදෙසා සටන් වදින්නේයැයි කියන අයි එස් අයි එස් අන්තවාදීන්ට එරෙහිව ලොව පුරා ඉස්ලාම් භක්තිකයෝ ඉදිරියට පැමිණෙමින් සිටින්නෝය.

මේ අන්තවාදීන්ගේ කි‍්‍රයාකාරකම් වලින් සාමකාමි ලෙස ජීවත්වන ඉස්ලාම් භක්තිකයින්ට පවා ලේබල ඇලවී ඇතැයි ඔවුහු කියන්නෝය.

මොවුන්ගේ කි‍්‍රයාකාරකම් වලට විරෝධය පෙන්වීමට සමාජ ජාල වෙබ් අඩවි ඔස්සේ සංවිධානය කෙරී ඇති වැඩසටහනක්ද මේ දිනවල කි‍්‍රයාත්මකය.

එම වැඩසහටන අනුව ප‍්‍රසිද්ධියේ අසිඑස් සංවිධානයට අයත් කොඩි ගිනි තැබිය යුතුය.‘‘අයිඑස්අයිඑස් කොඩි ගිනි තැබීමේ අභියෝගය‘‘ යැයි මෙම වැඩසටහන නම් කෙරී ඇත.

දැනටමත් දහස් ගණනක් දෙනා මෙයට සහභාගිව ඇත.ඔවුන් අතරින් බහුරතය ඉස්ලාම් භක්තිකයෝය.

එක් පුද්ගලයෙකු අයිඑස්අයිඑස් ධජයක් ගිනි තැබූ පසු ඔහු තවත් පුද්ගලයෙක්ට එසේ කර පෙන්වන්නැයි අභියෝග කළ යුතුවීම මෙම වැඩසටහනේ කොන්දේසියයි.

ඉස්ලාම් භක්තිකයන් මේ අන්තවාදීන්ට තම විරෝධය පෙන්වමින් සිටියදී ලෝක බලවත්හුද අන්තවාදීන්ට එරෙහිව අවි අතට ගනිමින් සිටිති.

පසුගියදා ඉරාකයේ හදිතා වේල්ල අත්පත් කර ගැනීමට පැමිණි අන්තවාදීන් කණ්ඩායමකට ගුවන් ප‍්‍රහාර එල්ල කර ඔවුන් පළවා හැරීමට ඇමරිකා ආරක්ෂක අංශ සමත් විය.ප‍්‍රහාර වලින් කණ්ඩායම සමග පැමිණි සන්නද්ධ රථ හා බර අවි රැුසක් විනාශවූ බව සඳහන්ය.

ඉදිරියේදී ඇමරිකා ජනපති බැරක් ඔබාමා අයිඑස් අන්තවාදීන්ට එරෙහි ඇමරිකාවේ ස්ථාවරය සම්බන්ධයෙන් ජනතාව දැනුම්වත් කිරීමට නියමිතව ඇත.

ඇමරිකා ආරක්ෂක අංශ බළධාරීන් පවසන්නේ ඇමරිකාව හා ඉරාක ආරක්ෂක අංශ,කුර්දි සටන්කාමිීන් එක්ව පිහිටුවාගන්නා සන්ධානයක් මගින් අයිඑස් අන්තවාදීන්ට එරෙහිව ප‍්‍රහාර එල්ල කරන බවය.

මෙහිදී වැඩි බර පැටවෙනු ඇත්තේ ඉරාක හා කුර්දි අංශ වලට බවත් ඔවුන් ආධාර ඉල්ලූවහොත් පමණක් ගුවන් ප‍්‍රහාර එල්ල කිරීම ආදියෙන් ඇමරිකාව ඔවුන්ගේ සහයට ඉදිරිපත් වනු ඇති බවත් ඇමරිකා බළධාරීන් පවසයි.

මුලින් අයිඑස් අන්තවාදීන්ගේ අවි ශක්තිය අඩපණ කිරීමත්,අනතුරුව ඔවුන් අත්පත් කරගෙන සිටින ප‍්‍රදේශයන් මුදවා ගැනීමත්,අවසානයේ ඔවුන්ව සම්පූර්ණයෙන්ම පරාජය කිරීමත් සිදුකරන බව ඔවුන් කියයි.