බීජිංහිදී (ඒ.එෆ්.පී/රොයිටර්)
 
තම පළමු ආසියානු සංචාරයේ තෙවැනි අදියරයට යමින් ඇමරිකා ජනාධිපති ඩොනල්ට් ට්‍රම්ප් අද (8) චීනයට පැමිණියේය.
 
ඇමරිකා ජනාධිපතිවරයාගේ චීන සංචාරයේදී උතුරු කොරියානු අර්බුදය සම්බන්ධයෙන් වැඩි අවධානයක් යොමුවනු ඇත. ඇමරිකා ජනාධිපතිවරයා චීනයට පැමිණීමට පෙර දකුණු කොරියානු පාර්ලිමේන්තුව අමතමින් උතුරු කොරියාවට නැවත වරක් අනතුරු ඇඟවූ අතර චීනය තවදුරටත් උතුරු කොරියාව හුදෙකලා කළ යුතු යැයි ද අවධාරණය කළේය.
 
චීනයට පැමිණීමට පෙර චීන ජනාධිපතිවරයාගේ දේශපාලන ජයග්‍රහණය අගය කිරීමට ඇමරිකා ජනාධිපතිවරයා කටයුතු කළේය. ඇමෙරිකා ජනාධිපතිවරයා මහත් හරසරින් පිළිගැනීමට ෂී ජින්පින්ග් ජනාධිපතිවරයා ප්‍රමුඛ චීනය කටයුතු කර තිබිණි.
 
ට්‍රම්ප් ජනාධිපතිවරයා තම බිරිඳ මෙලානියා ට්‍රම්ප් සමඟ සියවස් ගණනාවක සිට චීන අධිරාජ්‍යන්ගේ නිවහන වූ තහනම් නගරයේ ද සංචාරයක නිරත විය. එහිදි චීන ජනාධිපතිවරයා ඇමරිකා ජනාධිපතිවරයාට ආහාර වේලක් ද සූදානම් කර තිබූ අතර විදෙස් ජනාධිපතිවරයෙක් තහනම් නගරයේ සිට ආහාර ගත් පළමු අවස්ථාව ද මෙය විය.
 
මෙම සංචාරයත් සමඟ ලොව පළමු සහ දෙවන බලවත්ම පුද්ගලයන් දෙදෙනා බීජිං නුවරදී මුණ ගැසී තිබේ. එහෙත් ලොව බලවත්ම පුද්ගලයා ෂී ජින්පින්ග් ද නැතිනම් ඩොනල්ඞ් ට්‍රම්ප් ද යනුවෙන් විදෙස් මාධ්‍ය ජාත්‍යන්තරයට ප්‍රශ්නයක් යොමු කර තිබිණි.
 
055