කියුබාවේ කෙළවරක පිහිටි ඇමෙරිකාවට අයත් ග්වන්තනාමෝ සිර කඳවුරේ රැඳෙවියන් වෙනුවෙන් පෙනී සිටි නීතීඥවරයකු අබිරහස් ලෙස මිය ගොස් ඇතැයි ඇමෙරිකා මාධ්‍ය අනාවරණය කරයි.

මියගොස් ඇත්තේ 38 හැවිරිදි නීතීඥ ඇන්ඩි හාට්ය. එය දිවි නසා ගැනීමක් යැයි  බන්ධනාගාර නියාමකවරු පවසති. ඒ ගැන වැඩි දුර පරීක්ෂණ පැවැත්වෙයි.
ඇන්ඩි හාට් ද ග්වන්තනාමෝ සිරකඳවුර පිහිටා ඇති ඇමෙරිකානු නාවික හමුදා කඳවුරේ නවාතැන්ගෙන සිට ඇත. මියයෑමට පෙර ඔහු ලියූ ලිපියක් තමාට හමුවූ බව බන්ධනාගාර නියාමකවරු වැඩි දුරටත් කියා සිටිති.

ග්වන්තනාමෝ බේ සිරකඳවුර පසුගිය දිනවල කාගේත් කතාබහට ලක් විය. ඒ, එහි රැඳෙවියන් පිරිසක් මාස ගණනක් තිස්සේ උපවාසයක් ආරම්භ කිරීම නිසාය.
කියුබාවේ ඇමෙරිකන් පාලනය යටතේ පවතින ග්වන්තනාමෝ බොක්කේ ඇති එරට නාවික හමුදා කඳවුරේ ග්වන්තනාමෝ සිරකඳවුර ඇරැුඹුවේ 2002 වසරේ ජනවාරි 11 වැනිදාය.

ඇමෙරිකා රජය ත‍්‍රස්තවාදයට එරෙහි සටනේදී, අත්අඩංගුවට ගන්නා සැකකරුවන් රඳවා තැබෙන්නේ මෙම ග්වන්තනාමෝ බේ සිරකඳවුරේය. වසර ගණනක් තිස්සේ එහි සිරගත කර සිටින ඇතැමුන් නිරන්තරයෙන් කුරිරු වධ බන්ධනයන්ට ලක් කෙරෙන බව පැවැසෙයි. ග්වන්තනාමෝ බේ බන්ධනාගාරය පවතින්නේ ඇමෙරිකානු හමුදා පාලනය යටතේය. එහි නියාමකවරු හමුදා භටයෝය.

තමන්ට සිදුවන කුරිරු වධ බන්ධනයන්ට එරෙහිව ග්වන්තනාමෝ බේ සිරකඳවුරේ රැුඳෙවියන් මාස ගණනාවක් තිස්සේ උපවාසයක් අරඹා ඇත. උපවාසයේ යෙදන රැඳෙවියන් කිහිප දෙනකුගේ තත්ත්වය බරපතළ බව ජාත්‍යන්තර රතු කුරුස සංවිධානය නිවේදනය කර ඇත. බන්ධනාගාර නියාමකවරුන් උපවාසයේ යෙදෙන තමන්ට වතුර පොදක් හෝ ලබා නොදෙන බව ද වාර්තා වේ.

උපවාසයේ යෙදෙන එම රැඳෙවියන් කියා සිටින්නේ තමන්ට එරෙහිව චෝදනා ඉදිරිපත් කරන්නේ හෝ නඩු විභාග පවත්වන්නේ හෝ නැතිනම් තමන් වහා නිදහස් කරන ලෙසටය.

2008 වසරේ ජනපතිවරණයට ඉදිරිපත් වෙද්දී, ග්වන්තනාමෝ බේ බන්ධනාගාරය වසා දමන බවට ඔබාමා ප‍්‍රතිඥා දුන්නේය.

දෙවැනි ධුර කාලය ආරම්භ කළත්, ඔබාමාට එම පොරොන්දුව ඉටු කිරීමට නොහැකි විය. ඊට හේතුව එම රැඳෙවියන් මුදා හැරීම ඇමෙරිකාවේ ජාතික ආරක්ෂාවට තර්ජනයක් වීමය.