දකුණු කාශ්මීරයේ ඉන්දීය ආරක්ෂක අංශ සහ සටන්කාමීන් කණ්ඩායමක් අතර ඇති වූ ගැටුමකින් සටන්කාමීන් දෙදෙනෙකු ජීවිතක්ෂයට පත්ව ඇතැයි වාර්තා වේ. 
 
ආරක්ෂක අද අලුයම (12) කරන ලද මෙහෙයුමක් අතරවාරයේදී එම සටන්කාමීන් දෙදෙනා මියගිය බව නිලධාරියෙක් පැවැසීය. දකුණු කාශ්මීරයේ හෙන්ද් සතිඕරා ගම්මානයේ දී එම ගැටුම් ඇති වී තිබේ. 
 
“සටන්කාමීන් සැඟවී සිටින ස්ථාන සොයා ආරක්ෂක අංශ මෙහෙයුම් ක්‍රියාත්මක කළා. එම අවස්ථාවේදී සටන්කාමීන් ආරක්ෂක අංශ වෙත වෙඩි තැබුවා. සටන්කාමීන් දෙතුන් දෙනෙක් ගම්මානයේ සැඟවී සිටින බව තොරතුරු ලැබුණා. ගැටුම්වලින් සටන්කාමීන් දෙදෙනෙකු මියගිය බවට තොරතුරු ලැබී තිබෙනවා. ඒ බව විශ්වාසයි. එහෙත් තවමත් ඔවුන්ගේ සිරුරු ලැබුණේ නැහැ” යැයි එම නිලධාරියා කීවේය. 
 
ආරක්ෂක අංශවලට හසු වූ බව කියන සටන්කාමීන් දෙදෙනා නික්ලෝරාහි බෂාරත් අහ්මද් සහ කාසිපෝරාහි තරීක් අහ්මද් නමැත්තන් බව ආරක්ෂක අංශ විශ්වාස කරන බව ද වාර්තා විය. ඔවුන් දෙදෙනාම ලක්ෂාර් ඊ තලීබා සංවිධානයට අයත් යැයි ද කියැවේ. අහ්මද් නමැත්තා සටන්කාමීන් හා එකතුවීමට පෙර විශේෂ පොලිස් නිලධාරියකු ලෙස කටයුතු කර ඇති අතර අප්‍රේල් 26 වැනිදා ඔහු සිය රාජකාරී රයිෆලය ද සමඟ අතුරුදන් වී ඇතැයි ද වාර්තා විය. 
 
මියගිය හෝ අත්අඩංගුවට පත්වූ සටන්කාමීන් පිළිබඳ වැඩිදුර තොරතුරු ප්‍රසිද්ධියට පත් කර නැත. පූර්ව ආරක්ෂක පියවර ලෙස ප්‍රදේශයේ අන්තර්ජාල සේවා නවතා දැමීමට ද බලධාරීන් පියවර ගෙන ඇත. 
 
(ද හින්දු ඇසුරිනි) 
 055