ඇමෙරිකානු ඩොලරයට සාපේක්ෂව ඇෆ්ගන් මුදල් ඒකකය අවප්‍රමාණය වීමත් භාණ්ඩවල මිල ගණන් ඉහළ යෑමත් හේතුවෙන් කාබුල් වැසියන් දැඩි දුෂ්කරතාවලට මුහුණ දී ඇතැයි ඇෆ්ගනිස්තාන මාධ්‍ය වාර්තා කරයි.

ඉකුත් දින කිහිපයේදී ඇමෙරිකානු ඩොලරයට සාපේක්ෂව ඇෆ්ගන් මුදල් ඒකකය අඛණ්ඩව අවප්‍රමාණය වී තිබෙන මේ හේතුවෙන් භාණ්ඩවල මිල ගණන් වේගයෙන් ඉහළ ගොස් ඇතැයි ද ඒ නිසා ව්‍යාපාර කටයුතු අඩු වී ඇතැයි ද වාර්තා වේ.

ඔක්තෝබර් මාසයේ තෙවැනි සතිය වනවිට ඇමෙරිකානු ඩොලරයක් ඇෆ්ගානි 90ක් දක්ව පහළ ගොස් ඇතැයි ඇෆ්ගනිස්තාන මාධ්‍ය වාර්තා කරයි.

මේ සම්බන්ධයෙන් කඩිනම් පියවර ගන්නැයි කාබුල් වැසියන් ඇෆ්ගනිස්තාන මහ බැංකුවට බල කර ඇතැයි ද වාර්තා වේ.

ඇෆ්ගනිස්තානය සාමාන්‍යයෙන් ඇමෙරිකානු ඩොලර් බිලියන 8.5ක ආසන්න භාණ්ඩ‌ තොගයක් ආනයන කරන බවත් එම භාණ්ඩ මිලදී ගැනීම සඳහා ඩොලර් භාවිත කරන බවත් එම වාර්තාවල දැක්විණි.

(ඒ.එන්.අයි.)