නුදුරු අනාගතයේ දිනයකදී ඇමරිකාවද තම අණසක යටතට පත්කරගන්නා බවත් එදිනට ප‍්‍රසිද්ධියේ ඇමරිකා ජනපති බරක් ඔබාමාගේ හිස සිඳලන බවත් සඳහන් කරමින් නව වීඩියෝවක් නිකුත් කිරීමට අයිඑස් අන්තවාදීහු කටයුතු කර තිබේ.

එම වීඩියෝවේ බිම දණගැස්වූ කුර්දි ජාතික සොල්දාදුවෙකු පසුපස සිට ඇමරිකාවට, ප‍්‍රංශයට හා බෙල්ජියමට අනතුරු අඟවන අයිඑස් අන්තවාදීන් පිරිසක් දැක්වේ.වීඩියෝව අවසාන වන්නේ එම කුර්දි ජාතික හමුදා භටයාගේ හිස ගසා දැමීමෙනි.

පසුගියදා ප‍්‍රංශයේ පුවත්පත් කාර්යාලයකට අන්තවාදී ප‍්‍රහාරයක් එල්ල වූ අතර එම කාර්යාලයේ ප‍්‍රධාන පුවත්පත් කලාවේදීන් කිහිපදෙනෙකුම එම ප‍්‍රහාරයෙන් මරු දැකීය.බෙල්ජියමේද මෙවන් ප‍්‍රහාරයක් එල්ල කිරීමට අන්තවාදීන් දියත් කර තිබුණු සැළැස්මක් අනාවරණය කර ගැනීමට එරට පොලිසිය සමත්ව ඇත.

ඇමරිකාව කෙරේ නොසිඳෙන වෛරයකින් පසුවන අයිඑස් අන්තවාදීහු සැප්තැම්බර් 11 ප‍්‍රහාරය හා සමාන මහා පරිමාන ත‍්‍රස්ත ප‍්‍රහාරයකට පිඹුරුපත් සකසමින් සිටිය හැකි හෙයින් ඒ පිළිඹදව ඇමරිකාව සෝදිසියෙන් සිටිය යුතු බවට විචාරකයින් අනතුරු අඟවයි.

අන්තවාදීන්ට එරෙහිව සටන් දිගටම කි‍්‍රයාත්මකව පවතින අතර මුහුණට මුහුණලා සිදුවන ගැටුම් වල පෙරමුණේ සිටින්නේ කුර්දි ආරක්ෂක අංශයන්ය.මාස 2 ක් පුරා දිවූ දරුණු සටන් වලින් පසු ඔවුන් පසුගියදා අයිඑස් අන්තවාදීන්ගේ ප‍්‍රධාන බලකොටුවක් වුනු සිරියාවේ කොබේන් නගරය සම්පූර්ණයෙන්ම අත්පත් කර ගැනීමට සමත් විය.

මෙය විශාල ජයග‍්‍රහණයක් වූවත් සටන ඉදිරියටම ගෙනයෑමටනම් කුර්දි සේනාංක වහාම ප‍්‍රතිසංවිධානය විය යුතුව තිබෙන බව සටන් පෙරමුණේ සිටින මුල් පෙලේ කුර්දි ආරක්ෂක අංශ නිළධාරීන් පවසයි.