රුසියාව කළ යෝජනාවට කැමැත්ත පළ කරමින්, තම රසායනික අවි අන්තර් ජාතික පාලනයට යටත් කිරීමට සිරියානු ජනපති බෂීර් අල් අසාද්ගේ රජය එකඟ වීමත්, ඒ ගැන සළකා බලා සිරියාවට හමුදා ප‍්‍රහාරයක් එල්ල නොකිරීමට ඇමෙරිකා ජනපති ඔබාමා තීරණය කිරීමත් සිරියානු කැරැලිකරුවන්ගේ දැඩි දෝෂ දර්ශනයට හේතුවක් වී ඇත.

සිරියාවේ රජයට එරෙහිව සටන් වදින කැරැුලිකාර පාර්ශ්වය නියෝජනය කරන ‘සිරියානු ජාතික සන්ධාන පාලක මණ්ඩලය’ පවසා ඇත්තේ, ජනපති ඔබාමා ඔවුන් අමාරුවේ දැමූ බවත්, මිනීමරු පාලක අසාද්ට අනුකම්පා කරන බවත්ය.

‘සිරියානු ජාතික සන්ධාන පාලක මණ්ඩලය’ යනු සිරියාවේ විපක්ෂ දේශපලාන කණ්ඩායම් එක් වී පිහිටුවා ගත් දේශපාලන සන්ධානයකි.

”අප හුදෙකලා වුණා. දැන් අපට තනිවම සිරියානු රජය සමඟ සටන් කරන්න සිද්ධ වෙලා. ඔබාමා කටයුතු කළ ආකාරය නින්දාසහගතයි. ඔහුට යථාර්ථය අවබෝධ වුණේ නැහැ” යැයි කැරැලි නායක මොහොම්මද් ජවුද් පවසා ඇත.