බලයෙන් පහ කෙරුණු ඊජිප්තු ජනාධිපති මොහොමඞ් මොර්සිගේ අධාරකරුවන් කයිරෝ අගනුවර පිහිටුවා ගෙන තිබූ විරෝධතා කඳවුරට ඊයේ (15) පොලිස් ප‍්‍රහාරයක් එල්ල වූ අතර  එයින් විරෝතාකරුවෝ 278 දෙනෙක් ජීවිතක්ෂයට පත්වූහ.

පොලිසියට අණ ලැබී තිබුණේ කඳවුරු බැඳගෙන සිටි මොර්සි ආධාරකරුවන් සහ මුස්ලිම් සහෝදරත්වය පක්ෂයේ ආධාරකරුවන් විසුරුවා හැරීමය.
කැරැලි මර්දන පොලිස් නිලධාරීන් විරෝධතා කඳවුරට පැමිණෙද්දී විරෝධතාකරුවන්ගෙන් ඊට බාධා එල්ල වූ අතර දෙපිරිස අතර දරුණු ගැටුම් හට ගැනිණ. පොලිසිය විරෝධතාකරුවන්ට වෙඩි තබා ඇත්තේ එම අවස්ථාවේදීය.

එම අවස්ථාවේදී 278 දෙනකු ජීවිතක්ෂයට පත් වූ බවත් 2,000 කට වැඩි විරෝධතාකරුවන් පිරිසක් තුවාල ලැබූ බවත් ඊජිප්තු පුවත් සේවා වාර්තා කරයි.
ගැටුම්වලින් පොලිස් නිලධාරීන් 43 දෙනෙක් ද තුවාල ලැබූහ. මියගිය පිරිස අතර මාධ්‍යවේදීන් තිදෙනෙක් ද වෙති. ඔවුන්ගෙන් දෙදෙනකු විදෙස් මාධ්‍යවේදීන් බව ද පැවැසෙයි.

මුස්ලිම් සහෝදරත්වය පක්ෂය චෝදනා කරන්නේ පොලිසිය සමූල ඝාතනයක් සිදු කළ බවය.

ජගත් මානව හිමිකම් සංවිධාන පවසන්නේ ඊජිප්තුවේ මානව හිමිකම් කඩවීම් ඉතා දරුණු ලෙස සිදුවන බවය.  එක්සත් ජාතීන්ගේ සංවිධානය ඊජිප්තු අන්තර්වාර රජයෙන් ඉල්ලා සිටින්නේ රටේ සාමය ස්ථාපිත කිරීමට කඩිනමින් පියවර ගන්නා ලෙසය.

එසේම ඇතැම් විදෙස් මාධ්‍යය වාර්තා කර සිටියේ රටපුරා සිදුවු ප‍්‍රචණ්ඩ කි‍්‍රයා වලින් 525 දෙනෙක් ජීවිතක්ෂයට පත්ව ඇති බවයි.
 

ඊජිප්තු පොලිස් නිලධාරියෙක් විරෝධතාකරුවකුට පහර දෙමින්