හමුදා යොදවා ඉරානයට ප‍්‍රහාරයක් එල්ල කර මැදපෙරදිග තෙල් නිෂ්පාදන කටයුතු අවුල් කිරීමට තමා අපේක්ෂා නොකරන බව ඇමෙරිකා ජනාධිපති බැරැක් ඔබාමා අවධාරණය කරයි. ජනාධිපති ඔබාමා මේ බව කියා සිටියේ පෙරේදා (5) ඇමෙරිකාවේ එන්.බී.සී. රූපවාහිනී පුවත් සේවය සමඟ සම්මුඛ සාකච්ඡුාවකට සහභාගී වෙමිනි. ”ඇමෙරිකාවට ප‍්‍රහාරයක් එල්ල කරන්න ඉරානයට කිසිදු අවශ්‍යතාවයක් නැහැ. ඒවගේමයි ඒ සඳහා හමුදා ශක්තියක් ද ඔවුන් සතුව නැහැ. ඉරානය සමඟ ඇති අර්බුදය විසඳිය හැක්කේ සාකච්ඡා කිරීමෙන් පමණයි” ජනපති ඔබාමා පවසයි. ඉරානයට එරෙහිව හමුදාමය මැදිහත්වීමක් කළොත්  මැදපෙරදිග තෙල් නිෂ්පාදන කටයුතුවලට විශාල වශයෙන් බාධා එල්ල වී එයින් සෘජුව හා වක‍්‍රව ඇමෙරිකාවට ද බලපෑමක් එල්ල වේවි යැයි ජනපති ඔබාමා පෙන්වා දෙයි. ලබන නොවැම්බර් මාසයේදී යළිත් වරක් ඇමෙරිකා ජනපතිවරණයට ඉදිරිපත් වන ඔබාමා තවත් විදෙස් සංග‍්‍රාමයක් ආරම්භ නොකරනු ඇතැයි ඇමෙරිකා දේශපාලන විචාරකයෝ පවසති.