නවදිල්ලිහිදීය (රොයිටර්)

මාස දහයකට පසු පළමු වරට ඉන්දියාවේ ඩීසල් පරිභෝජනය පහත වැටී ඇතැයි එරට රජයේ දත්ත සඳහන් කරයි.

එම දත්තවලට අනුව පසුගිය වසරේ සැප්තැම්බර් මාසයේ ඩීසල් පරිභෝජනය හා සංසදනය කිරීමේදී මේ වසරේ සැප්තැම්බර් මාසයේ ඩීසල් පරිභෝජනය ද පහත වැටී ඇත.

කෙසේ නමුත් ගෙවී ගිය මාස හතරක කාලයේදී පෙට්‍රල් අලෙවිය වර්ධනය වී ඇත. එහෙත් එය වැඩි වී ඇත්තේ ද අඩු අගයකිනි. පෙට්‍රල් සඳහා සැලකිය යුතු ඉල්ලුමක් තිබුණ ද ඉහළ මිල ගණන් නිසා ඉල්ලුම අඩු වූ බව එම දත්ත පෙන්වාදෙයි.

ඉන්දියාව තුළ එලෙස පෙට්‍රල් සහ ඩීසල් අලෙවිය අඩු වීම නිසා මේ වසරේ සැප්තැම්බර් මාසයේ සමස්ත ඉන්ධන ඉල්ලුම සියයට 1.1කින් අඩු වී ඇත. එසේ වුවත් ද්‍රවීකාරක ඛනිජ ගෑස් සහ ජෙට් යානා සඳහා යොදාගන්නා ඉන්ධනවල අලෙවිය ඉහළ ගොස් තිබේ.

ඉන්දියාවේ ඉන්ධන පරිභෝජනය එක අතකින් බලන විට ලෝකයේ තෙල් ඉල්ලුමෙන් සැලකිය යුතු ප්‍රමාණයක් වන අතර ඉන්දියාව ඉරානයෙන් තෙල් මිලදී ගන්නා ප්‍රමුඛතම රටක් ද වේ.

පසුගිය මාසයේ ඉන්දියාවේ ඉන්ධන පරිභෝජනය ටොන් මිලියන 16.54ක් වූ අතර එය අගෝස්තු මාසය හා සැලකීමේදී සියයට 1.3ක පහත වැටීමක් යැයි එරට ඛනිජ තෙල් අමාත්‍යාංශයේ ඛනිජ තෙල් සැලැසුම් සහ විශ්ලේෂණ අංශයේ දත්ත පෙන්වාදෙයි.

ඉන්දියාවේ ඉන්ධන පරිභෝජනය අඩුවීම නිසා එරට කාර්මික අංශයේ නිෂ්පාදනය ද අඩු වී ඇත.

055