ඇමෙරිකාවට අයත් ගැඹුරු මුහුදේ තෙල් සහ ගෑස් කැණීම් ස්ථීරවම තහනම් කිරීමට ඇමෙරිකා ජනපති බැරැක් ඔබාමා තීරණය කර ඇතැයි වාර්තා වෙයි.

ආක්ටික් හා අත්ලන්තික් මුහුදේ ප්‍රදේශ තෙල් හා ගෑස් නිධි සඳහා බදු දීම ස්ථීරවම නවතා දැමීමට ඔහු තීරණය කර ඇත.

එරට සාගර කලාප ආරක්ෂා කිරීමේ අරමුණින් ජනාධිපති ධුරයෙන් විශ්‍රාම ගැනීමට පෙර මෙම තීරණය ගෙන ඇති බව එරට මාධ්‍ය වාර්තා කරයි.ඇමෙරිකාව සමග කැනඩාවද මීට සමාන තීරණයක් ගෙන ඇති බව වාර්තා වෙයි.

ඔබාමාගේ තීරණය ජනවාරියේ පත්වන ඩොනල්ඩ් ට්‍රම්ප් වෙනස් කරනු ඇතැයි මත පළවෙයි.ජනාධිපතිවරණ වේදිකාවේදී ට්‍රම්ප් පැවසුයේ තමන් ඇමෙරිකාවේ තෙල් හා ගෑස් මූලාශ්‍ර වලින් තම රටට ආදායමක් ගෙන එන බවයි.

ඇමෙරිකා පෙට්‍රෝලියම් ආයතනය පවසනුයේ මෙවන් තහනමක් සදාකාලික නොවන බවයි.එමෙන්ම මෙම තීරණය නව ජනපති විසින් අවලංගු කරනු ඇතැයි ද කියයි.

පෙර ජනාධිපතිවරයෙකු ගත් මෙවන් තීරණයක් කිසිම ජනපති කෙනකු විසින් අත්හිටුවා නැති බවත් ට්‍රම්ප් එලෙස ඔබාමාගේ තීරණය අවලංගු කළහොත් ට්‍රම්ප්ට අධිකරණයේ පෙනී සිටීමට සිදුවනු ඇතැයි පරිසරවේදීයෝ කියති.