ස්වයංක්‍රීය ගිනි අවියකින් නව හැවිරිදි දැරියකට වෙඩි තැබීමේ පුහුණුව ලබාදෙමින් සිටි ගිනි අවි පුහුණුකරුවෙකු එම දැරියගේ අතින් අවියේ පාලනය ගිලිහීම නිසා වෙඩිකා මියගොස් ඇති පුවතක් ඇමරිකාවේ ඇරිසෝනා ප්‍රාන්තයෙන් වාර්තා වේ.

සිදුවීම සටහන්ව ඇති වීඩියෝ පටයකුත් ඇරිසෝනා පොලිසිය අන්තර්ජාලයට එක්කර තිබේ. එහි දැක්වෙන ආකාරයට පුහුණුකරු අවිය දැරියට ලබාදී එක් වරක් වෙඩි තබා පෙන්වන්නැයි කියයි.

ඇය එසේ කළ පසු ඔහු ‘‘හරි දැන් අපි එක පිට එක උණ්ඩ පිටවෙන විදියට අවිය සකස් කරමු.දැන් පුළුවන්ද බලන්න‘‘ යැයි පවසා අවිය දැරිය අතට දේ.

අනතුරුව වීඩියෝ ඇත්තේ වෙඩි පිට වෙඩි පිටවෙද්දී අවිය කෙලින් අල්ලාගෙන සිටිනු නොහැකිව දැරිය වම් පසට නොදැනුවත්වම හැරුණු ආකාරයත් වම් පස සිටිනා පුහුණුකරු ඇයගේ අතේම ඇති අවියෙන් වෙඩි කා බිම ඇද වැටෙන ආකාරයත් දැකගත හැකි විය.

ඔහුව වහාම රෝහල වෙත ගෙනයාමට පියවර ගෙන ඇත්තද ඒ වට විටත් හිසට වැදුණු උණ්ඩයක් නිසා ඔහු සිට ඇත්තේ මියගොස්ය.

මෙම පුහුණුකරු හිටපු හමුදා සෙබළෙකුද බව සදහන් අතර මෙවන් වැරදීමක් කෙසේ සිදුවූවේ දැයි සිතාගත නොහැකි බව ඔහුගේ මිතුරෝ කියති.

ඔහු සේවය කළ ආයතනයේ නම ‘‘බුලට්ස් ඇන්ඩ් බර්ගර්ස්‘‘ වේ. එහි වෙබ් අඩවියේ දැක්වෙන්නේ මෙවැන්නකි.

‘‘අපගේ ආයතනයට පැමිණෙන්නන්ට ඕනෑම ආකාරයක අවියක් භාවිතා කරන්නට හැක. විශේෂයෙන් ඔබට ස්වයංක්‍රීය මැෂින් තුවක්කුවකින් වෙඩි තබා බැලීමට වුවමනා නම් ඒවාද අප සතුව ඇත.ඉතින් එන්න.ඇති පදම් වෙඩි තබන්න‘‘

ඇමරිකාවේ ගිනි අවියක් භාවිතා කරන්නට වයස අවුරුදු 18 ට වැඩිව තිබීම අනිවාර්ය වන මුත් කුඩා දරුවෙකුට වැඩිහිටියෙකු හෝ  පුහුණුකරුවෙකු යටතේ හෝ අවි පුහුණුව ලැබීමට බාධාවක් නැත.

වසය අවුරුදු 9 ක දැරියකට අවි පුහුණුව ලබා දෙන්නේ කවර ආකාරයේ දෙමව්පියෝ දැයි කියා නම් සිතා බැලිය යුතු බව මෙම පුවත සම්බන්ධයෙන් අදහස් පළ කර තිබූ බොහෝ දෙනා සඳහන් කර තිබුණි.

කාගේදැයි පෙන්වා දිය නොහැකි වැරැද්දක් නිසා නිකරුණේ ජීවිතයක් අහිමිව ගොස් ඇත.

article-2734769-20D5863B00000578-14_306x423aa