(දයාසීලි ලියනගේ)   
හිටපු ජනාධිපති මහින්ද රාජපක්ෂ මහතා ශ්‍රී ලංකා නිදහස් පක්ෂයේ උපදේශකවරයකු වශයෙන් සිටින නිසා, මැතිවරණ ප්‍රචාරක කටයුතුවලට ඔහුගේ රුව යොදා ගැනීමට රජයේ ඇතැම් මැති ඇමැතිවරුන් අදහස් දැක්වීම පිළිබඳව පක්ෂයේ දෙපාර්ශ්වයම අතර පුළුල් මතභේදයක් හට ගෙන ඇති බව වාර්තා වේ.   

ශ්‍රී ලංකා නිදහස් පක්ෂයේ රජයේ පාර්ශ්වයේ ඇතැම් මැති ඇමැතිවරු ඉදිරිපත් කර ඇති මෙම මතයට, දැඩි විරෝධය දක්වන බව ඒකාබද්ධ විපක්ෂයේ සම සංවිධායක පාර්ලිමේන්තු මන්ත්‍රී රංජිත් ද සොයිසා මහතා ප්‍රකාශ කළේය.   

මහින්ද රාජපක්ෂ මහතා පක්ෂයේ උපදේශක වූවත්, ඔහුගේ ඡායාරූපය යොදා ගනිමින් මැතිවරණ ප්‍රචාරක කටයුතු සිදුකිරීම කිසිසේත්ම ඒකාබද්ධ විපක්ෂය අනුමත නොකරන බවද ඔහු කීය.   

මේ සම්බන්ධයෙන් ගතයුතු ක්‍රියාමාර්ග ඒකාබද්ධ විපක්ෂයේ පක්ෂ නායකයන් රැස්වී තීන්දුවක් ගන්නා බවද ඔහු කීය.   

මේ සම්බන්ධයෙන් රජයේ ජ්‍යෙෂ්ඨ ඇමැතිවරයෙක් ප්‍රකාශ කළේ මහින්ද රාජපක්ෂ මහතාගේ නම හා ඡායාරූපය යොදා ගනිමින් ප්‍රචාරක කටයුතු නොකළ යුතු බවයි. රජයේ පාර්ශ්වයේ ජයග්‍රහණය පිළිබඳ සැකයක් නොමැති නිසා, මහින්ද රාජපක්ෂ මහතාගේ ඡායාරූපය හෝ නම ප්‍රචාරක කටයුතුවලට යොදා ගැනීම නොකළ යුතු බවද ඔහු කීය.