(අජන්ත කුමාර අගලකඩ) 

ජනාධිපති ගෝඨාභය රාජපක්ෂ, අගමැති මහින්ද රාජපක්ෂ සහ හිටපු ජනාධිපති මෛත්‍රීපාල සිරිසේන යන මහත්වරුන් අතර විශේෂ දේශපාලන හමුවක් පසුගිය සතියේ පවත්වා ඇත. 

ජනාධිපතිවරයා සහ හිටපු ජනාධිපතිවරයා අතර විශේෂ හමුව ඉකුත් බද‌ාද‌ා දහවල් ජනාධිපති කාර්යාලයේදී පැයක පමණ කාලයක් තිස්සේ පැවැති අතර එයට ඔවුන් දෙදෙනා හැර වෙනත් කිසිවකුත් සහභාගි වී නැති බව වාර්තා වේ. 


එහිදී වත්මන් දේශපාලන තත්ත්වය, රජයේ ඉදිරි වැඩපිළිවෙළ සහ ශ්‍රී ලංකා පොදුජන පෙරමුණත් ශ්‍රී ලංකා නිදහස් පක්ෂයත් එක්ව ඉදිරි මහමැතිවරණයට තරග කිරීම සම්බන්ධයෙන් සාකච්ඡා වී ඇති බව දේශපාලන ආරංචිමාර්ග සඳහන් කරයි. 


 මේ අතර අගමැති මහින්ද රාජපක්ෂ සහ හිටපු ජනාධිපති මෛත්‍රීපාල සිරිසේන යන මහත්වරුන් අතර හමුව ඉකුත් අඟහරුවාද‌ා හැන්දෑවේ අරලියගහ මන්දිරයේදී පැයක පමණ කාලයක් පැවැති බව වාර්තා විය. 


 එම සාකච්ඡාවට ද අගමැතිවරයා සහ හිටපු ජනාධිපතිවරයා හැරුණු කොට වෙනත් කිසිවකුත් සහභාගි වී නොමැත. 


 එහිදී ද වත්මන් දේශපාලන තත්ත්වය සහ පක්ෂ දෙක එක්ව පුළුල් සන්ධානයකින් ලබන මහ මැතිවරණයට තරග කිරීම සම්බන්ධයෙන් සාකච්ඡා වී ඇති බව දැනගන්නට තිබේ. 
 ජනාධිපතිවරයා සහ හිටපු ජනාධිපතිවරයා අතර හමුවත් අගමැතිවරයා සහ හිටපු ජනාධිපතිවරයා අතර හමුවත් ඉතා සුහද මට්ටමින් පැවැති බව ද වාර්තා වේ.