2021 ඔක්තෝබර් මස 21 වන බ්රහස්පතින්දා
(අජන්ත කුමාර අගලකඩ)
ජනාධිපති මෛත්‍රීපාල සිරිසේන මහතා ලබන 17 වැනිදායින් පසුව සිය ධුරයෙන් විශ්‍රාම යන බැවින්, කොළඹ මහගමසේකර මාවතේ පිහිටි නිල නිවසේ තිබූ කාර්යාලය මේ වනවිට ඉවත් කරමින් පවතින බව වාර්තා වේ.
ජනාධිපතිවරයාගේ නිල සාකච්ඡා කටයුතු සඳහා ජනාධිපති නිල නිවසේ වෙනම සාකච්ඡා කාමරයක් පවත්වාගෙන ගිය අතර, එහි මේස, පුටු, ශබ්ද විකාශන යන්ත්‍ර සහ මයික්‍රෆෝන ආදිය ජනාධිපතිවරයාගේ උපදෙස් මත දැනටමත් ඉවත් කර තිබේ.
ලබන 16 වැනිදා පැවැත්වෙන ජනාධිපතිවරණයෙන් පසුව ජනාධිපති ධුරයෙන් විශ්‍රාම යන මෛත්‍රීපාල සිරිසේන මහතා ශ්‍රී ලංකා නිදහස් පක්ෂයේ සභාපතිවරයා ලෙස පක්ෂ මූලස්ථානයේ කටයුතු වෙනුවෙන් පූර්ණ කාලීනව කැපවීමට තීරණය කර ඇතැයි වාර්තා වේ.
මෛත්‍රීපාල සිරිසේන මහතා ජනාධිපති නිල නිවෙස ලෙස දැනට භාවිත කරන මහගමසේකර මාවතේ නිල නිවෙස, විශ්‍රාම යාමෙන් පසුව ද ඔහුට ලබාදීමට කැබිනට් මණ්ඩලය ගිය සතියේ අනුමැතිය ලබා දුන්නේය.
ඉකුත් 2015 ජනවාරි මස 8 වැනිදා පැවැති ජනාධිපතිවරණයෙන් ශ්‍රී ලංකාවේ 6 වන විධායක ජනාධිපතිවරයා ලෙස පත්වූ මෛත්‍රීපාල සිරිසේන මහතා ජනාධිපතිවරණයට නැවත තරග නොකරන බවට ප්‍රතිඥාවක්ද දුන්නේය.
