වෛද්‍ය නිලධාරී සංගමයේ චෝදනා 

(දයාසීලි ලියනගේ)  

වසංගත රෝග විද්‍යා අංශය මගින් රජයේ රෝහල්වලට ප්‍රමාණවත් තරම් කොරෝනා එන්නත් ලබා නොදීම නිසා රෝහල් බලධාරීන් බලවත් අසීරුතාවකට පත්ව ඇතැයි රජයේ වෛද්‍ය නිලධාරීන්ගේ සංගමය සෞඛ්‍ය ඇමැති කෙහෙළිය රඹුක්වැල්ල මහතාට ලිඛිතව දන්වා ඇත.  

රෝහල් වලට එන්නත් සුළු ප්‍රමාණයක් ලබා දීමත් වෙනත් අංශවලට එන්නත් විශාල ප්‍රමාණයක් ලබා දීමත් නිසා ජනතාව මෙන්ම රෝහල් බලධාරීන් ද අසීරුතාවට පත්ව ඇතැයි රජයේ වෛද්‍ය නිලධාරීන්ගේ සංගමයේ සහකාර ලේකම් වෛද්‍ය නවීන්ද සොයිසා මහතා කීය. 

 
එන්නත් තුන් දහසක් ඉල්ලුම් කළ විට එන්නත් තුන් සියයක් පමණ ලබාදීම නිසා මේ තත්ත්වය ඇති වී තිබෙන බව ද ඔහු ප්‍රකාශ කළේය.  

මීට අමතරව කොරෝනා මර්දනය පිළිබඳ නිල වගකීම වසංගත රෝග අංශයට පවරන ලෙස හා කොරෝනා ඇඳිරි නීතිය පැවැත්වෙන දින 10 ක කාලය තුළ ලබා ඇති ප්‍රගතිය අනාවරණය කරන ලෙසත්, එන්නත් පිළිබඳ පූර්ණ වගකීම වසංගත රෝග අංශයට පවරන ලෙසත් රජයේ වෛද්‍ය නිලධාරීන්ගේ සංගමය ඇමැති කෙහෙළිය රඹුක්වැල්ල මහතාගෙන් ඉල්ලීම් කර ඇත. 

 
වයස අවුරුදු 60 වැඩි අයට එන්නත් කිරීම මෙතෙක් අවසන් කර නොමැති බැවින් ඔවුන් දැඩි අවදානමක පසුවන බව පෙන්වා දුන් බවත් වෛද්‍ය නවීන්ද සොයිසා මහතා කීය.