(මහින්ද නිශ්ශංක)  
පළාත් පාලන ආයතන 341න් ඉතිරි ආයතන 248 මැතිවරණ පැවැත්වීමට අදාළ නාමයෝජනා බාර ගැනීම හෙට (18) සිට ලබන 21දා දහවල් 12.00 දක්වා සිදුකරන බව අතිරේක මැතිවරණ කොමසාරිස් එම්.එච්. මොහොමඩ් මහතා පැවැසීය.  

මෙම ඡන්ද විමසීම් සඳහා තරග කිරීමට බලාපොරොත්තු වන ස්වාධීන කණ්ඩායම්වල අපේක්ෂකයන් ලබන 20දා දහවල් 12ට පෙර ඇපමුදල් තැන්පත් කළ යුතු බවද අතිරේක කොමසාරිස් මොහොමඩ් මහතා කීය.  

මෙම පළාත් පාලන ආයතන 248ට මහ නගර සභා 17ක් නගර සභා 23ක් සහ ප්‍රාදේශීය සභා 208ක් ඇතුළත් වේ.  

මේ අතර නාමයෝජනා බාරගැනීම අවසන් වූ පළාත් පාලන ආයතන 93 සහ නාමයෝජනා බාර ගැනීමට නියමිත ආයතන 248 ඡන්ද විමසීමේ දී තැපෑලෙන් ඡන්දය ප්‍රකාශ කිරීම සඳහා අයදුම්පත් බාර ගැනීම ලබන 22 දා දක්වා සිදු කිරීමට මැතිවරණ කොමිසන් සභාව තීරණය කර ඇත.