(අජන්ත කුමාර අගලකඩ)  

මාස කිහිපයක් තිස්සේ නතර වී තිබූ ආණ්ඩුවේ පක්ෂ නායකයන්ගේ රැස්වීම සතියකට හෝ සති දෙකකට වරක් විජේරාම මාවතේ අගමැති නිල නිවසේ දී යළි පැවැත්වීමට ආණ්ඩුවේ බලධාරීන් තීරණය කර ඇතැයි දේශපාලන ආරංචිමාර්ග සඳහන් කරයි. 

ආණ්ඩුවේ අභ්‍යන්තර දේශපාලන කාරණා සාකච්ඡා කිරීමට ආණ්ඩුවේ පක්ෂ නායකයන්ගේ රැස්වීම අගමැති මහින්ද රාජපක්ෂ මහතාගේ ප්‍රධානත්වයෙන් සතියකට හෝ සති දෙකකට වරක් පවත්වන ලෙස පක්ෂ නායකයන් කළ ඉල්ලීමකට අනුව මෙම තීරණය ගෙන ඇතැයි වාර්තාවේ.  

පොදුජන පෙරමුණට සම්බන්ධ දේශපාලන පක්ෂවල නායකයන්ගේ රැස්වීමක් ආණ්ඩුව පිහිටුවීමට පෙර සහ ආණ්ඩුව පිහිටුවීමෙන් අනතුරුව මහින්ද රාජපක්ෂ මහතාගේ ප්‍රධානත්වයෙන් විජේරාම නිල නිවසේ මාස කිහිපයක් පැවැත්වූ නමුත් පක්ෂ නායකයන්ගේ කාර්ය බහුලතාව හා කොරෝනා වසංගතය හේතුවෙන් පසුගිය මාස කිහිපයේම එය නොපැවැත්විණි.  

ආණ්ඩුවේ පක්ෂ නායකයන්ගේ රැස්වීම සුපුරුදු පරිදි සතිපතා නොපැවැත්වෙන නිසා අභ්‍යන්තර කාරණ සාකච්ඡා කිරීමට අවස්ථාවක් නොමැති බවට ආණ්ඩුවේ පක්ෂ නායකයන් කිහිප දෙනකුට ආණ්ඩුවේ බලධාරීන්ට දන්වා අැතැයි වාර්තා වේ.  

මේ තත්ත්වය සැලකිල්ලට ගනිමින් පක්ෂ නායකයන්ගේ රැස්වීම සතියකට හෝ දෙකකට වරක් අගමැතිවරයාගේ ප්‍රධානත්වයෙන් විජේරාම නිල නිවසේ දී නැවත පැවැත්වීමට තීරණය කර ඇති බව ආරංචිමාර්ග කියයි.