(දයාරත්න ඇඹෝගම)
ගමන් බෑගයක බහා තිබු මියගිය සුනඛයෙකුගේ සිරුරක් රැයක් පුරාම ආරක්ෂා කිරීමට පරසන්ගස්වැව පොලිසියට සිදුවු පුවතක් අද (06) වාර්තා විය.

පරසන්ගස්වැව,සදමල්ගම,සියඹලෑව ගම්මානයෙන් මෙම පුවත වාර්තා විය.

සියඹලෑව ගම්මානයේ ප්‍රධාන මාර්ගයේ සිට මිටර් හාරසියක් පමණ දුරින් පිහිටි කැළැබද ප්‍රදේශයක තිබූ ගමන් බෑගයක් තුළ සැක කටයුතු යමක් ඇති බවට පොලිසියේ අංක 119 දුරකතනයට (05) දින පස්වරුවේ ලද තොරතුරක් මත එම ස්ථානයට ගිය පොලිස් නිලධාරින්ට බෑගය තුලින් ගලා එන ඕජස් සහ පණුවන්ද දැකිය හැකි වී තිබේ.

ඒ අනුව බෑගය තුළ මියගිය අයෙකුගේ සිරුරක් ඇති බවට සැකපල කළ පොලිස් නිලධාරිහූ ඊයේ (05)දින රාත්‍රි සිට පසුදා අද (06)දක්වා එම ස්ථානයේ ආරක්ෂක රාජකාරිවල නිරත වූහ.

මෙම සිද්ධිය ගම පුරා ප්‍රචාරය විමත් සමඟ  එම ස්ථානයට පැමිණි  අයෙකු සදහන් කලේ එම ගම්මානයේම පදිංචි තරුණයෙකු මෙවැනි ගමන් බෑගයක්  රැගෙන මහමග ගමන් කළ බව දුටු බවයි.

ඒ අනුව පොලිසිය එම තරුණයා සොයා කළ  විමසුමේදි ඔහු කියා සිටියේ තම ගෙවත්තේ අනාරක්ෂිත ළිදකට වැටි මෙන් මියගිය සුනඛයාගේ  සිරුර විදේශගතව සිටි  මව ගෙන ආ බෑගයට දමා කැලෑවට දැමු බවයි.

මේ සම්බන්ධයෙන් වැඩිදුර විමර්ශන කටයුතු සදහා මහේස්ත්‍රාත්වරයාද ගෙන්විමට පොලිසිය පියවර ගෙන තිබුනද අවසන් මොහොතේ එය වැළැක්විණි.

සිද්ධිය සම්බන්ධයෙන් මෙම බෑගය  කැළෑවට විසිකළ  එම ප්‍රදේශයේම පදිංචි 20 හැවිරිදි තරුණයෙකු පොලිසිය විසින් අත් අඩංගුවට ගෙන ඇති අතර ඔහු අද (06)දින අධිකරණයට ඉදිරිපත් කිරිමට නියමිතව තිබුණි.

සිද්ධිය සම්බන්ධයෙන් පරසන්ගස්වැව පොලිසිය වැඩිදුර පරීක්ෂණ පවත්වති.