(බිඟුන් මේනක ගමගේ) 

පළාත් සභා මැතිවරණය කඩිනමින් පැවැත්වීමේ අරමුණෙන් පැරැණි සමානුපාතික ක්‍රමය අනුගමනය කිරීමට ගියහොත් කාන්තා නියෝජනය වැඩි කිරීමේ රාජ්‍ය ප්‍රතිපත්තිය අර්බුදයට යනු ඇතැයි මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයේ ( සී.එම්.ඊ.වී) ජාතික සම්බන්ධීකාරක මංජුල ගජනායක මහතා ‘ලංකාදීප’ යට පැවසීය.

පැරැණි ක්‍රමය යටතේ පළාත් සභා මැතිවරණය පැවැත්වීමට දේශපාලන පක්ෂ නායකයන් හය දෙනෙකු පමණ සිය මනාපය පළ කර ඇති නමුත් එමගින් කාන්තා නියෝජන ප්‍රතිපත්තියට අත්වන ඉරණම ගැන තීරණයක් ගෙන නැතැයි ද ගජනායක මහතා කීය.

මනාප ක්‍රමයට අනුව පළාත් සභා මැතිවරණය පවත්වන්නේ නම් මිශ්‍ර මැතිවරණ ක්‍රමයේ අන්තර්ගත කාන්තා නියෝජනය අහෝසි වන්නේදැයි පැහැදිලි කරන ලෙස ඉල්ලා මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය පක්ෂ නායකයින් වෙත දැනටමත් ලිපියක් යොමු කර ඇතැයි ද ගජනායක මහතා සඳහන් කළේය.

මැතිවරණ ක්‍රමය වෙනස් කළ ද නොකළ ද මැතිවරණ පැවැත්වීමට ගතවන කාලයෙහි වෙනසක් නොවන්නේ යැයි ද පරණ ක්‍රමයට යන්නේ නම් පවතින ක්‍රමය අවලංගු කරන බවට හා අලුතින් යම් ක්‍රමයක් අනුගමනය කරන බවට වෙන වෙනම පනත් දෙකක් පාර්ලිමේන්තුවට ඉදිරිපත් කළ යුතු යැයි ද ගජනායක මහතා වැඩිදුරටත් සඳහන් කළේය.