(රංජන් කස්තුරි)

එක්සත් ජාතික පෙරමුණේ සජිත් ප්‍රේමදාස මහතාගේ කණ්ඩායම මහා මැතිවරණයට ‘‘හදවත‘‘ ලකුණ යටතේ අපේ ජාතික පෙරමුණ පක්ෂයෙන් තරඟ කිරීමට තීරණය කර ඇතැයි වාර්තාවේ.

අපේ ජාතික පෙරමුණ පක්ෂයේ නිලධාරී මණ්ඩලය සහ සළකුණ වෙනස් කර දෙන්නැයි සජිත් කණ්ඩායමේ මන්ත්‍රීවරුන් පිරිසක් ඉකුත් සිකුරාදා (07) මැතිවරණ කොමිසමෙන් ඉල්ලීමක් කර තිබේ.

අපේ ජාතික පෙරමුණ මැතිවරණ කොමිසන් සභාව පිළිගත් දේශපාලන ලක්ෂයක් වන අතර එහි සභාපතිවරයා ලෙස සේනක ද සිල්වා මහතාත් ලේකම් ලෙස හිටපු පළාත් සභා මන්ත්‍රීනි ඩයනා ගමගේ මහත්මියත් දැනට කටයුතු කරති.

එම පක්ෂය ඉකුත් ජනාධිපතිවරණයේදී සහ ඊට පෙර පැවැති මැතිවරණ කිහිපයකදීම තරඟ කළ පක්ෂයකි.

එම පක්ෂයේ වර්තමාන නිලධාරී මණ්ඩලය ඉවත්කර ඒ වෙනුවට නව නිලධාරී මණ්ඩලයක් පත්කිරීම පිළිගන්වන ලෙස සජිත් කණ්ඩායම මැතිවරණ කොමිසන් සභාවෙන් ලිඛිත ඉල්ලීමක් කර තිබේ.

මීට අමතරව එම පක්ෂයේ දැනට භාවිතා කරන ටෙලිෆෝනය ලකුණ වෙනස්කර ඒ වෙනුවට හදවත ලකුණ ලබාදෙන්නැයිද ඉල්ලීමක් කර තිබේ.