(අංජුල මහික වීරරත්න)

ශ්‍රී ලංකාවේ වත්මන් දේශපාලන ක්‍රියාදාමය පිටුපස කිසිදු විදේශ රටක් සිටින බවට පිළිගත හැකි සාක්ෂි කිසිවක් නැතැයි එක්සත් ජාතික පෙරමුණේ නායක රනිල් වික්‍රමසිංහ මහතා කොළඹ දී අද (31) පැවැසීය.

විදේශ රටවල තානාපති කාර්යාල මෙරට දේශපාලන ක්‍රියාදාමයට සම්බන්ධ  යැයි තොරතුරු පැතිරෙන්නේ ගොසිප් වෙබ් අඩවි , ඇතැම් සමාජ මාධ්‍ය ජාලා වල පමණක් බවද වික්‍රමසිංහ මහතා මෙහිදී කීය.

රනිල් වික්‍රමසිංහ මහතා මේ අදහස් පළ කළේ කොළඹ විදේශ ප්‍රවෘත්ති ඒජන්සි කීපයක මාධ්‍යවේදීන් හමුවූ අවස්ථාවේදීය.

මෛත්‍රීපාල සිරිසේන මහතා ජනාධිපතිවරණ පොදු අපේක්ෂක ලෙස ඉදිරිපත් කිරීමේ ක්‍රියාදාමය පිළිබඳව ද මාධ්‍යවේදීහු එහිදී ප්‍රශ්න කළහ.ඊට පිළිතුරු ලෙස රනිල් වික්‍රමසිංහ මහතා මෙසේද පැවැසීය.

එවකට සිටි ජනාධිපති මහින්ද රාජපක්ෂ මහතා පරදවා බලයෙන් පහ කර රටේ ප්‍රජාතන්ත්‍රවාදය යලි ස්ථාපිත කිරීමට නම් පොදු අපේක්ෂකයෙකු ඉදිරිපත් කළ යුතු බවට ප්‍රබල මතයක් පැවතුනා.සිවිල් සංවිධාන සහ ඇතැම් දේශපාලන පකෂ ජනාධිපතිවරණයට පොදු අපේක්ෂකයෙක් පත්කළ යුතු බවට වන ස්ථාවරයෙන් තදින්ම සිටියා.

ඇතැම් දේශපාලන පක්ෂ සිවිල් සංවිධාන විසින් පොදු අපේක්ෂකයෙකු සඳහා නම් කීපයක්ම ඉදිරිපත් කළා.හිටපු ජනාධිපති චන්ද්‍රිකා බණ්ඩාරනායක කුමාරතුංහ මහත්මිය පොදු අපේක්ෂක සඳහා සුදුසු යැයි යෝජනා කළේ ශ්‍රී ලංකා නිදහස් පක්ෂයේ මහ ලේකම්වරයා වූ මෛත්‍රීපාල සිරිසේන මහතායි.සමහර සිවිල් සංවිධාන හා දේශපාලන පක්ෂ චන්ද්‍රිකා කුමාරතුංග මහත්මිය පිළිබඳ යෝජනායට විරුද්ධ වුයේ නැහැ.ඇතැම් දේශපාලන පක්ෂ ඒ අවස්ථාවේදී යෝජනා කළේ පොදු අපේක්ෂකයෙකු ඉදිරිපත් වන්නේ නම් තම පක්ෂ ජනාධිපතිවරණ අපේක්ෂකයෙක් ඉදිරිපත් නොකරන බවයි.

සිවිල් සංවිධාන හා ඇතැම් දේශපාලන පක්ෂ කළ යෝජනාව අනුව මෛත්‍රීපාල සිරිසේන මහතා පොදු අපේක්ෂක ලෙස ඉදිරිපත් කර එක්සත්  ජාතික පක්ෂය මගේ යෝජනාව සම්මත කිරීමත් සමඟ පොදු අපේක්ෂකයාට සහාය දීමට බොහෝ දේශපාලන පක්ෂ සහ සිවිල් සංවිධාන පෙළ ගැසුණු බවද රනිල් වික්‍රමසිංහ මහතා වැඩිදුරටත් සඳහන් කළේය.