(නිමන්ති රණසිංහ)

සංචරණ සීමා හේතුවෙන් බලපත‍්‍ර ලබාදුන් වෙළෙඳසැල් අධික මිලකට භාණ්ඩ විකුණුන්නේ නම්, වහාම එම බලපත‍්‍ර අහෝසි කිරීමට කටයුතු කරන බව සමුපකාර සේවා, අලෙවි සංවර්ධන හා පාරිභෝගික ආරක්ෂණ රාජ්‍ය අමාත්‍ය ලසන්ත අලගියවන්න මහතා පවසයි.

ඒ අනුව, එම බලපත‍්‍රය ප‍්‍රදේශයේ වෙනත් වෙළෙඳසැළඛට ලබාදීමට කටයුතු කරන බවද අමාත්‍යවරයා සඳහන් කළේය.

කොවිඞ් වයිරසය ව්‍යාප්තිය හේතුවෙන් දිවයින පුරා ක‍්‍රියාත්මක කර ඇති සංචරණ සීමා නිසා ජනතාවට අත්‍යවශ්‍ය භාණ්ඩ ලබා ගැනීම වෙනුවෙන් ග‍්‍රාමසේවා වසමකින් වෙළෙඳසල් දෙක බැගින් විවෘත කිරීමට රජය පියවර ගෙන ඇති බවද ඔහු පැවසීය.

දිවයින පුරාම ජංගම බෙදා හැරීම්, දුරකථන ඇමතුම් මගින් භාණ්ඩ නිවසට ගෙන්වා ගැනීම් ද මෙම කාලසීමාව තුළ සිදුකර ගතහැකි බවත්, මෙම සේවා මගින් යමකු අධික මිල ගණන් යටතේ භාණ්ඩ අලෙවි කිරීම සම්බන්ධව පාරිභෝගික කටයුතු අධිකාරියේ ක්ෂණීක ඇමතුම් අංක 1977ට ලැබෙන ඇමතුම් අනුව මෙහෙයුම් ක‍්‍රියාත්මක කරන බවද රාජ්‍ය අමාත්‍යවරයා වැඩිදුරටත් පැවසීය.