(තිළිණි ද සිල්වා සහ රංජන් කටුගම්පොළ)

පසුගිය මහමැතිවරණයේදී මාතලේ දිස්ත්‍රික්කය සඳහා සමගි ජන බලවේගයෙන් තරග කළ අපේක්ෂකයින් ලැබූ මනාප ඡන්ද නැවත ගණන් කරන ලෙසට නියෝග කරන්නැයි ඉල්ලා එම පක්ෂකයෙන්ම තරග කොට පරාජයට පත් වූ අපේකෂයකු වන හිටපු පාර්ලිමේන්තු මන්ත්‍රී රංජිත් අලුවිහාරේ මහතා ගොනු කළ රිට් පෙත්සම අනිද්දා (06) සලකා බැලීමට අභියාචනාධිකරණය අද (04) නියෝග කළේය.

පෙත්සම්කාර රංජිත් අලුවිහාරේ මහතා ගොනු කළ මෙම පෙත්සමේ වගඋත්තරකරුවන් ලෙස සමගි ජනබලවේගයේ මහලේකම්වරයා ,එම දිස්ත්‍රික්කයෙන් පාර්ලිමේන්තුවට තේරී පත් වූ මන්ත්‍රී රෝහිණී කුමාරි කවිරත්න , මාතලේ තේරීම් බාර නිලධාරියා ඇතුළු 14 දෙනෙකු නම් කරනු ලැබ සිටිති.

පෙත්සම්කාර හිටපු පාර්ලිමේන්තු මන්ත්‍රී රංජිති අලුවිහාරේ මහතා සිය පෙත්සමෙන් පෙන්වා දී ඇත්තේ ඉකුත් මහ මැතිවරණයේදී සමගි ජන බලවේගය පක්ෂයෙන් මාතලේ දිස්ත්‍රික්කය සඳහා තරඟ වැදුණු අපේක්ෂකයින්ගේ මනාප ඡන්ද ගණනය කිරීමේදී අක්‍රමිකතා සිදු වූ බවය.

මැතිවරණයේ ජන්ද ප්‍රතිඵල ගණන් කිරීමේදී ලග්ගල සහ දඹුල්ල යන ජන්ද ගණන් කිරීමේ මධ්‍යස්ථාන වල සිටි සිය නියෝජිතයින් 21 දෙනකු ඉන් ඉවත්කිරීමට කටයුතු කෙරුණු බවත් , රෝහිණී කවිරත්න මහත්මියගේ ඡන්දපොළ නියෝජිතයින් එම ස්ථානයේ රැඳී සිටීමට ප්‍රධාන ගණන් කිරීමේ නියෝජිතවරයා ක්‍රියාකර ඇතැයි ද පෙත්සම්කරු සිය පෙත්සමේ සදහන් කර ඇත.

එම ක්‍රියාව පාර්ලිමේන්තු මැතිවරණ පනතේ 51 සහ 52 වගන්තීන් වලට පටහැනි බවත් , එබැවින් එම දිස්ත්‍රික්කයට සමගි ජනබලවේගයෙන් තරග කළ අපෙක්ෂකයින් ලැබූ මනාප ඡන්ද නැවත ගණන් කරන ලෙස දිස්ත්‍රික් තේරීම් බාර නිලධාරියාට නියෝග කරන්නැයිද පෙත්සම්කාර හිටපු පාර්ලිමේන්තු මන්ත්‍රීවරයා සිය පෙත්සම මගින් ඉල්ලා ඇත.