(සිතුම් චතුරංග)
 
යාපනය මැතිවරණ කොට්ඨාසයේ අපේක්ෂකයින්ගේ මනාප ප්‍රතිඵල නිකුත් කරන අවස්ථාවේ යාපනය දිස්ත්‍රික් ලේකම් කාර්යාලය තුළ අද (7) අලුයම පක්ෂ ආධාරකරුවන් දෙපිරිසක් අතර උණුසුම් තත්වයක් හට ගැණිනි.

ඉලංගෙයි තමිල් අරසුකච්චි පක්ෂය නියෝජනය කළ එම්.ඒ සුමන්තිරන් මහතාගේ ආධාරකරුවන් පිරිසක් හා අකිල ඉලංගෙයි තමිල් කොංග්‍රසයේ ආධාරකරුවන් අතර ගුටිබැට හුවමාරුවක් ද සිදුවූ බව යාපනය පොලිසිය පවසයි.

මනාප ගණන් කිරීම සිදුවන අවස්ථාවේ සුමන්තිරන් මහතා පරාජය වී සිටි බවත් දෙවනවර ගණන් කිරීමේදී ඔහු පාර්ලිමේන්තු මන්ත්‍රීධුරය සඳහා සුදුසුකම් ලැබීම සම්බන්ධයෙන් ඇතිවූ බහින් බස්වීමක් මෙම ගැටුමට හේතු වී ඇති බව පොලිසිය පවසයි.

ගැටුම හටගන්නා අවස්ථාවේ තත්වය පාලනය කිරීම සඳහා පොලිස් විශේෂ කාර්ය බළකාය, පොලිස් කැරලි මර්දන ඒකකය ද යාපනය දිස්ත්‍රික් ලේකම් කාර්යාලයට කැඳවීමට සිදුවිණි.

විශේෂ කාර්ය බළකා සෙබලුන් හා පොලිසිය මැදිහත්ව පිරිස දිස්ත්‍රික් ලේකම් කාර්යාල භූමියෙන් ඉවත්කිරීමට පියවර ගත් අතර තත්වය සමතයකට පත්කිරීමට ක්‍රියාකළේය.

ගැටුම හේතුවෙන් දිස්ත්‍රික් ලේකම් කාර්යාලයේ හි ස්ථාපිත කර තිබූ තාවකාලික කූඩාරම් හා පුටු ඇතුළු දේපළ කිහිපයකට ද හානි සිදුව තිබිණි.

සිද්ධිය සම්බන්ධයෙන් කිසිවෙකු අත්අඩංගුවට ගෙන නොමැති අතර යාපනය පොලිසිය වැඩිදුර විමර්ශන සිදුකරයි.