මහාපරිමාණ හෙරොයින් ජාවාරම්කරුවන්ට නීතීපතිගේ මාර්ගෝපදේශය බලනොපැවැත්වේ

(මනෝප‍්‍රිය ගුණසේකර)

සුළු ප්‍රමාණයේ මත්ද්‍රව්‍ය සිද්ධීන් සම්බන්ධයෙන් දැනට රිමාන්ඞ් බාරයේ රඳවා සිටින සැකකරුවන්ට කොන්දේසි සහිත ඇප ලබාදීමට මාර්ගෝපදේශයක් ඉදිරිපත් කරන නීතීපතිවරයා මහාපරිමාණ හෙරොයින් ජාවාරම්කරුවන්, මුදල් විශූද්ධිකරන්නන් ඇතුළු අපරාධකරුවන්ට මෙම මාර්ගෝපදේශ බලනොපැවැත්වෙන බවද වැඩබලන පොලිස්පතිවරයාට ලිඛිතව දැනුම් දී ඇත.

කොරෝනා වයිරසය ව්‍යාප්තවීම හේතුවෙන් දැනට බන්ධනාගාරවල ඇති අවදානම් තත්වය සැළකිල්ලට ගනිමින් බන්ධනාගාරවල තදබදය අඩු කිරීම කෙරෙහි සැළකිලිමත් වන ලෙසට ජනාධිපති ලේකම් ආචාර්ය පී.බී. ජයසුන්දර මහතා කළ දැනුම් දීම සැළකිල්ලට ගනිමින් නීතීපති ජනාධිපති නීතීඥ දප්පුල ද ලිවේරා මහතා එලෙස දැනුම් දී ඇත.

දැනට රිමාන්ඩ් බාරයේ පසුවන සැකකරුවන් 13,000 කට අධික පිරිසෙන් සැකකරුවන් 8,000 ක්ම මත්ද්‍රව්‍ය වැරදි සම්බන්ධයෙන් රිමාන්ඞ් බාරයේ පසුවන බවත් මේ තත්වය හේතුවෙන් බන්ධනාගාර වල අධික තදබදයක් නිර්මාණය වී ඇති බවත් ඒ සම්බන්ධයෙන් සිදුකළ සාකච්ඡාවකදී අනාවරණය වී ඇති අතර පසුව අදාළ තදබදය අඩු කිරීම සඳහා මාර්ගෝපදේශයක් ඉදිරිපත් කරන ලෙස ජනාධිපති ලේකම්වරයා නීතීපතිවරයාට කළ දැනුම් දීමකට අනුව නීතීපතිවරයා විසින් අදාළ මාර්ගෝපදේශ ඉදිරිපත් කරන ලදී.

නීතීපතිවරයා වැඩබලන පොලිස්පතිවරයාට යොමු කළ එම ලිපියේ පිටපත් අගවිනිසුරුවරයාට, අධිකරණ සේවා කොමිෂන් සභාවේ ලේකම්වරයාට, බන්ධනාගාර කොමසාරිස් ජනරාල්වරයාට, ශ්‍රී ලංකා නීතීඥ සංගමයේ සභාපතිවරයාට සහ පොලිස් නීතී කොට්ඨාශයේ නියෝජ්‍ය පොලිස්පතිවරයාටද යොමු කොට ඇත.

හෙරොයින් ශුද්ධ බර ග්‍රෑම් 02 ට වැඩි සැකකරුවන්ට මෙම සහනය කිසිසේත් අදාළ නොවන බවද නීතීපතිවරයා අවධාරණය කොට ඇතැයි නීතීපතිවරයාගේ සම්බන්ධීකරන නිලධාරී ජ්‍යෙෂ්ඨ රජයේ නීතීඥ නිශාරා ජයරත්න මෙනවිය පැවසුවාය.

රජයේ රස පරීක්‍ෂක වාර්කාව නිකුත් වී නොමැති අවස්ථාවකදී හෙරොයින් දළ බර ග්‍රෑම් 10-20 අතර ඇති මාස තුනකට වඩා වැඩි කාලයක් රිමාන්ඞ් බාරයේ සිටින සැකකරුවන්ටද හෙරොයින් දළ බර ග්‍රෑම් 05-10 අතර මාසයකට වඩා වැඩි කාලයක් රිමාන්ඞ් බාරයේ සිටින සැකකරුවන්ටද හෙරොයින් දළ බර ග්‍රෑම් 05 අඩු මාස තුනකට වඩා වැඩි කාලයක් රිමාන්ඞ් බාරයේ සිටින සැකකරුවන්ටද හෙරොයින් ශූද්ධ බර ග්‍රෑම් 01-02 අතර ඇති මාස තුනකට වඩා වැඩි කාලයක් රිමාන්ඞ් බාරයේ සිටින සැකකරුවන්ටද හෙරොයින් ශූද්ධ බර ග්‍රෑම් 01 අඩු මාසකට වඩා වැඩි කාලයක් රිමාන්ඞ් බාරයේ සිටින සැකකරුවන්ටද කොන්දේසි සහිත ඇප නියම කළ හැකි බව පෙන්වා දෙන නීතීපතිවරයා ගංජා කිලෝ ග්‍රෑම් 05 කට වඩා වැඩි මාසයකට වඩා වැඩි කාලයක් රිමාන්ඞ් බාරයේ සිටින සැකකරුවන්ටද ගංජා කිලෝ ග්‍රෑම් 05 කට වඩා අඩු සැකකරුවන්ටද කොන්දේසි සහිත ඇප නියම කළ හැකි බව පෙන්වා දී ඇත.

මහා පරිමාණ හෙරොයින් ජාවාරම්කරුවන්ට, මුදල් විශූද්ධීකරණ චෝදනා ලබා ඇති සැකකරුවන්ට පුරුද්දක් ලෙස මත්ද්‍රව්‍ය වැරදි සිදුකරන පුද්ගලයින් මෙන්ම ලියාපදිංචි අපරාධකරුවන්ට මෙම සහනය ලබාදීමට නිර්දේශ නොකරන නීතීපතිවරයා ඇප මත මුදාහරින සැකකරුවන් සම්බන්ධයෙන් සමීප අධීක්‍ෂණයක් සිදුකරන ලෙස අදාළ ප‍්‍රදේශයේ පොලිස්ථානාධිපතිවරයාට උපදෙස් දෙන ලෙසද වැඩිදුරටත් දැනුම් දී ඇත.