(තිළිණි ද සිල්වා)

නීති විරෝධී ලෙස බංග්ලාදේශ මුහුදු සීමාවට ඇතුළු වූ මෙරට ධීවරයින් 24 දෙනෙකු බංග්ලාදේශ නාවික හමුදාව අත්අඩංගුවට ගෙන ඇතැයි බංග්ලාදේශ ශ්‍රී ලංකා මහකොමසාරිස් කාර්යාල ආරංචි මාර්ග සඳහන් කරයි.  

ටෝලර් යාත්‍රා හතරකින් ධීවර කටයුතුවල නිරත වෙමින් සිටි ධීවරයින් පිරිසක් මෙලෙස අත්අඩංගුවට පත්ව ඇත.

බංග්ලාදේශ නාවික හමුදාව අත්අඩංගුවට ගත් ධීවරයින් පිරිස මේවන විට පටෙන්ගා පොලිස් ස්ථානය වෙත භාරදී ඇති අතර ඔවුන් අධිකරණයට ඉදිරිපත් කිරීමට නියමිතව ඇතැයි ශ්‍රී ලංකා මහකොමසාරිස් කාර්යාල ආරංචි මාර්ග වැඩිදුරටත් සඳහන් කරයි.

අත්අඩංගුවට පත් වූ මෙම ධීවරයින් පිරිස අම්බලන්ගොඩ, බේරුවල, ත්‍රිකුණාමලය යන ප්‍රදේශවලින් ධීවර කටයුතු සඳහා පිටත්වගිය පිරිසක් බවද එම ආරංචි මාර්ග කියා සිටී.

ශ්‍රී ලාංකික ධීවරයින් පිරිස බංග්ලාදේශයට අයත් බෙංගාල බොක්ක චිතගොං වරාය ආසන්න මුහුදු ප්‍රදේශයේ ධීවර කටයුතුවල නිරතව සිට ඇතැයි ද සඳහන් වේ.

බංග්ලාදේශ අත්අඩංගුවේ සිටින මෙරට ධීවරයින් නිදහස් කරගැනීම සඳහා රාජ්‍යතාන්ත්‍රික මට්ටමින් මැදිහත් වීමට බලාපොරොත්තු වන බවද ශ්‍රී ලංකා මහ කොමසාරිස් කාර්යාලය කියා සිටී.