(අජිත්ලාල් ශාන්තඋදය)

රත්නපුර දිස්ත‍්‍රික් පාර්ලිමේන්තු මන්ත‍්‍රී පේ‍්‍රමලාල් ජයසේකර මහතා ඇතුළු තිදෙනෙකුට එරෙහි නඩුවේ තීන්දුව දීමට ලබන අපේ‍්‍රල් 24 දින දක්වා නඩුව කල් තබන බව රත්නපුර පළාත් බද අභියාචනාධිකරණ විනිසුරු සහ රත්නපුර අංක 02 මහාධිකරණයේ වැඩබලන මහාධිකරණ විනිසුරු එස්.එම්.ඒ.එස්.පී. සේතුංග මහතා අද (18) විවෘත අධිකරණයේ දී දැනුම් දුන්නේය.

පසුගිය ජනාධිපතිවරණ සමයේ කහවත්තේ පැවත්වීමට නියමිතව තිබූ එක්සත් ජාතික පක්‍ෂ රැස්වීමක සැරසිලි කරමින් සිටි පිරිසකට වෙඩි තබා පුද්ගලයෙක් ඝාතනය කිරීම සහ තවත් පුද්ගලයන් දෙදෙනකුට මරණීය තුවාල සිදුකිරිම සම්බන්ධයෙන් අධිචෝදනා ලබා සිටී.

පූර්වගාමී මහාධිකරණ විනිසුරුවරයා ඉදිරියේ පසුගිය ජනවාරි 17 දින මෙම නඩුව කැදවූ අවස්ථාවේ එහි තීන්දුව ප‍්‍රකාශයට පත් කිරිම නඩුව විමසූ විනිසුරුවරයා පත්කරන ලෙස අගවිනිසුරුවරයාට දන්වා යවා නැවත කැඳවීම නියම කරනු ලැබීය. 

එහෙත් අද (18) වනවිට මහාධිකරණ විනිසුරු ප‍්‍රදීප් අබේරත්න මහතා වෙනුවට රත්නපුර පළාත් බද අභියාචනාධිකරණ විනිසුරු සහ රත්නපුර අංක 02 මහාධිකරණයේ වැඩබලන මහාධිකරණ විනිසුරු එස්.එම්.ඒ.එස්.පී. සේතුංග මහතා රත්නපුර මහාධිකරණ අංක දෙකේ වැඩබලයි.

සබරගමු පළාත් සභාවේ හිටපු මන්ත‍්‍රී අරුණ නිලන්ත ජයකොඩි, කහවත්ත ප‍්‍රාදේශීය සභාවේ හිටපු සභාපති මානික්ක වඩුගේ වජිර දර්ශන ද සිල්වා සහ රත්නපුර දිස්ත‍්‍රික් පාර්ලිමේන්තු මන්ත‍්‍රී පේ‍්‍රමලාල් ජයසේකර යන මහත්වරු මෙම නඩුවේ විත්තිකරුවෝ වෙති.

ඉදිරිපත් වූ කරුණු සැළකිල්ලට ගෙන මෙම නඩුවේ තීන්දුව දීම සම්බන්ධව පූර්වගාමී මහාධිකරණ විනිසුරුවරයාගේ නියෝගය අගවිනිසුරුවරයාට නැවත දන්වා යැවීමට කටයුතු කරන බවද වැඩබලන මහාධිකරණ විනිසුරු එස්.එම්.ඒ.එස්.පී. සේතුංග මහතා සඳහන් කළේය.

පළමු සහ දෙවන විත්තිකරුවන් වෙනුවෙන් නීතීඥ හර්ෂණ විජේනායක මහතා පෙනී සිටියේය. තුන්වන විත්තිකරු වෙනුවෙන් ජනාධිපති නීතීඥ අනිල් ද සිල්වා මහතා සමගනීතීඥ තුෂාරී සූරියාරච්චි මහත්මිය පෙනී සිටියාය.

එහිදී වැඩිදුර විභාගය අප්‍රෙල් 24 දින දක්වා කල් තැබිණි.