(යොහාන් භාසුර)

ශ්‍රී ලංකාව තුළ ‘කොවිඩ්’ වයිරසය සීඝ්‍රයෙන් පැතිර යෑම ආරම්භ වූ 2020 වසරේ මුල කාලයේ මුව ආවරණ (මාස්) සැපයීම සඳහා මාලිගාවත්ත ප්‍රදේශයේ වෛද්‍යවරයෙක්ගෙන් ලබාගත් රුපියල් ලක්‍ෂ හතහාමාරක් වංචා කළේ යැයි චෝදනාවට වයස අවුරුදු 20 ක කාන්තාවක් සහ ඇගේ සැමියා කොළඹ මධ්‍ය කොට්ඨාස අපරාධ විමර්ශන ඒකකය අත්අඩංගුවට ගෙන තිබේ.

රත්පුර පිටරවුම් පාරේ පදිංචි කාන්තාවක් සහ ඇයගේ 32 හැවිරිදි  සැමියා මෙලෙස අත්අඩංගුවට ගත් බව කී පොලිසිය කොවිඩ් ව්‍යාප්තියත් සමඟ මුව ආවරණ මිල ඉහළ ගිය අවස්ථාවේ මුව ආවරණයක් රුපියල් පහක මිලකට මුව ආවරණ ලක්ෂ එකහමාරක් සැපයීම සඳහා මෙම මුදල් ලබාගෙන ඇතැයි ද සඳහන් කළේය.

ඔවුන් වෙනත් කාන්තාවකගේ හැදුනුම්පත් භාවිතා කරමින් සකසාගත් බැංකු ගිණුමකට වෛද්‍යවරයාගෙන් රුපියල් ලක්ෂ හතහාමාරක මුදල බැරකරගෙන සැගවී සිට ඇති බවත් සමාජ මාධ්‍ය ජාලයක් ඔස්සේ එම පුද්ගලයන් සහ වෛද්‍යවරයා සම්බන්ධවී ඇතැයි ද කොළඹ මධ්‍යම කොට්ඨාස අපරාධ විමර්ශන ඒකකය පවසයි.

ඔම පුද්ගලයන් දෙදෙනා අධිකරණයට ඉදිරිපත් කිරීමට නියමිතය.

කොළඹ මධ්‍යම කොට්ටාස බාර ජ්‍යෙෂ්ඨ පොලිස් අධිකාරී නිශාන්ත චන්ද්‍රසේකර මහතාගේ උපදෙස් මත කොට්ඨාස අපරාධ විමර්ශන කාර්යංශයේ ස්ථානාධිපති ප්‍රධාන පොලිස් පරීක්ෂක ධම්මික පෙරේරා, පොලිස් සැරයන් ප්‍රියන්ත (3856), පොලිස් කොස්තාපල්වරුන් වන දිද්දෙණිය (91055), සෙනෙවිරත්න (37823), කාන්තා පොලිස් කොස්තාපල් අනූෂා (11280) සහ පොලිස් රියදුරු කුමාර (80348) යන කණ්ඩායම වැඩිදුර පරීක්‍ෂණ ක්‍රියාත්මක කරයි.