බළලුන් ඇතුළු සුරතල් සතුන් තම නිවෙස්වලම තබා ගන්න යැයි බ්‍රිතාන්‍ය පශු වෛද්‍යවරු පිරිසක් විසින් උපදෙස් නිකුත් කර තිබේ.

පර්යේෂණයකින් හෙළි වී ඇත්තේ බළලුන්ට වෙනත් බළලුන්ගෙන් වයිරසය පැමිණිය හැකි බවයි.

සතුන් තුළ ‍වයිරසය තිබේදැයි සොයා ගැනීමට කරන ලද පර්යේෂණ අනුව සුරතල් සතුන් තම ලෝම තුළ මේ වයිරසය තැන තැන රැගෙන ගොස් තවත් පුද්ගලයන්ට බෝ කිරීමේ ප්‍රවණතාවක් ඇති බව තහවුරු වී තිබේ.

ඒ හේතුවෙන් බ්‍රිතාන්‍ය පශු වෛද්‍ය සංගමයේ සභාපති ඩැනියෙලා ඩොස් සැන්ටොස් සඳහන් කරන්නේ මෙම අවධානනම වළක්වාගැනීම සඳහා සුරතල් සතුන්ගේ හිමිකරුවන් විසින් ඉතා ප්‍රවේශම් සහගත මෙන්ම සතුන් ද ආරක්ෂා කරගෙන තමන්ද ආරක්ෂා වන උපක්‍රම අනුගමනය කළ යුතු බවයි.
 
''හොඳ සනීපාරක්ෂාවක් පුරුදුවන්න, බළලුන් තම නිවසේම තබාගන්න. ඔබ ඔබේ සුරතල් සතුන් සමඟ අනවශ්‍ය සම්බන්ධතා ඇතිකර නොගන්න. ඔවුන් වැළඳගැනීමෙන් වළකින්න. එමෙන්ම ඔබේ මුහුණ ලෙව කෑමට ඉඩ නොතබන්න. කිසිම අවස්ථාවක නාදුනන සතුන්ට අත නොතබන්න. ඔවුන්ට සමීප නොවන්න." යනුවෙන් හොංකොං හි  වෛද්‍යවරයෙකු වන ඒන්ජල් අල්මේන්ඩ්‍රොස් පවසා තිබේ. 

කොරෝනා වයිරසයට ගොදුරු වූ බව තහවුරු කරගත් හොංකොං හි වයස අවුරුදු 17ක් වූ සුරතල් සුනඛයකුගේ සිද්ධිය සම්බන්ධයෙන් අදහස් දක්වමින් ඔහු එසේ පවසා ඇත.  

''නමුත් ඔවුන්ගේ සිරුරේ කොවිඩ්-19 වයිරසය තිබුණත් ඔවුන් අසනීප වන්නේ නැහැ. මීට පෙර 2003 වර්ෂයේ දී හොංකොං හි සාර්ස් රෝගය පැතිර යද්දී සුරතල් සතුන් ගණනාවක් ආසාදනය වී සිටි නමුත් කිසිම අවස්ථාවක අසනීප වුණේ නැහැ. බල්ලන් හෝ බළලුන් අසනීප වීම ගැන හෝ ඔවුන්ගෙන් මිනිසුන්ට රෝගය පැතිරෙන බවට කිසිදු සාක්ෂියක් නැහැ." ඔහු පවසා තිබේ.

මෙම රෝගය මිනිසුන්ගෙන් සතුන්ට සම්ප්‍රේෂණය විය හැකි ආකාරය සම්බන්දව පර්යේෂකයෝ මෙසේ පවසති.
"මිනිසුන්ගේ ශ්වසන බිඳිති මගින් බළලුන්ට ආසාදනයවීමට අවස්ථාවක් තිබෙන බව පෙනේ. මිනිසුන් කැස්ස, කිවිසුම් යාම හෝ හුස්ම ගැනීම වැනි ක්‍රියාවන් මගින් අවට පරිසරයට වයිරසය මුදා හැරේ. ඉන් අනතුරුව එය වෙනත් සතුන්ගේ සිරුරු වෙත ඇතුළුවීමට  ඉඩ ඇත."

බෙල්ජියමේ නිවසක සිටි බළලකු රෝග ලක්ෂණ පෙන්නුම් කර සතියකට පමණ පසු කොරෝනා වයිරස පරීක්ෂාවට යොමුකළ අතර ශරීරයේ වයිරසය ඇති බව තහවුරු කෙරිණි.

විද්‍යාඥයන් විසින් මේ සම්බන්ධයෙන් කරන ලද පරීක්ෂණයෙන් තවුරු වී ඇත්තේ බළලුන් මගින් වයිරසය තවත් බළලුන්ට සම්ප්‍රේෂණය කරන බවයි.

(බීබීසී ඇසුරිණි - 085)