(හර්ෂණ තුෂාර සිල්වා)

පාකිස්තානයේ සංචාරයක නිරතවන්නැයි එරට අග්‍රාමාත්‍ය ඉම්රාන් ඛාන් මහතා ජනාධිපති ගෝඨාභය රාජපක්ෂ මහතාට ඇරැයුම් කර ඇත.

පාකිස්තානය අග්‍රාමාත්‍යවරයාගේ එම ආරාධනය ජනාධිපති ගෝඨාභය රාජපක්ෂ මහතා විසින් පිළිගනු ලැබ තිබේ.

ගෝඨාභය රාජපක්ෂ මහතා ජනාධිපති ධුරයට පත්වූ පසු පාකිස්තාන අග්‍රාමාත්‍ය ඉම්රාන් ඛාන් මහතා ට්විටර් පණිවුඩයක් නිකුත් කරමින් ඔහුට සුබ පැතුම් එක් කළ අතර පසුව දුරකතන ඇමතුමක් දෙමින් දෙරටේ සබඳතා වර්ධනය කර ගැනීම සම්බන්ධයෙන් සාකච්ඡා පවත්වා ඇත.

ශ්‍රී ලංකාවේ ජනතාව ගෝඨාභය රාජපක්ෂ මහතාගේ නායකත්වය සහ දැක්ම පිළිබඳ විශ්වාසය තබා ඇති බව මැතිවරණ ප්‍රතිඵලයෙන් පෙනී යන බව සඳහන් කර ඇති පාකිස්තාන අග්‍රාමාත්‍ය ඉම්රාන් ඛාන් මහතා ගෝඨාභය රාජපක්ෂ මහතාගේ නායකත්වය යටතේ ශ්‍රී ලාංකික ජනතාව සාර්ථකත්වය සහ සෞභාග්‍යය ළඟා කරගනු ඇතැයි ද සඳහන් කර ඇත.

ඊට අමතරව විවිධ අංශවලින් දෙරටේ සහයෝගීත්වය සහ ද්විපාර්ශවීය සබඳතා ශක්තිමත් කරගැනීම සම්බන්ධයෙන් ද නායකයන් දෙදෙනා සාකච්ඡා කළ බවත් පාකිස්තාන අග්‍රාමාත්‍යවරයාගේ කාර්යාලය නිකුත් කළ නිවේදනයක දැක්විණි.