(ඩයනා උදයංගනී)

මහ වැසි සමඟ ඇති වූ ජල ගැලීම්, ගංවතුර සහ නායයෑම් හේතුවෙන් මරණ හතරක් වාර්තා වී ඇති අතර දිවයිනේ දිස්ත්‍රික්ක හතකට අයත් පවුල් 41,717කට අයත් 183,028 දෙනකු පීඩාවට පත්ව සිටින බව ආපදා කළමනාකරණ මධ්‍යස්ථානය පවසයි.

ගම්පහ, රත්නපුර, කොළඹ, පුත්තලම, නුවරඑළිය, කෑගල්ල සහ කළුතර දිස්ත්‍රික්කවල ජනතාව මෙයින් පීඩාවට පත්ව ඇති අතර පීඩාවට පත් පවුල් 1,084 කට අයත් 4,863 දෙනෙක් ආරක්ෂිත ස්ථාන 31 ක රැඳී සිටින බව ද එම මධ්‍යස්ථානයේ සහකාර අධ්‍යක්‍ෂ (පූර්ව දැනුම්දීම්) ප්‍රදීප් කොඩිප්පිලි මහතා කියයි

තවත් පවුල් 405 කට අයත් 1,553 දෙනෙක් ඥාති නිවෙස්වල රැඳී සිටින බව ද ඔහු සඳහන් කළේය.

මින් වැඩිම පීඩාවක් සිදුව ඇත්තේ ගම්පහ දිස්ත්‍රික්කයට වන අතර එහි ප්‍රාදේශීය ලේකම් කොට්ඨාශ 13ක පවුල් 30,188 කට අයත් 1,23,559 දෙනෙක් පීඩාවට පත්ව සිටින අතර ඉන් 847 කට අයත් 3925 දෙනෙක් ආරක්ෂිත ස්ථානවලත්, පවුල් 42කට අයත් 172 දෙනෙක් ඥාති නිවෙස්වලත් රැඳී සිටිති.

ආපදා තත්වය හේතුවෙන් මෙම දිස්ත්‍රික්කවල නිවාස 10 ක් සම්පූර්ණයෙන් විනාශ වී ඇති අතර තවත් නිවාස 569 කට අර්ධ හානි සිදුව ඇත.