(කාංචන කුමාර ආරියදාස)
 
කන්ඩලම ජලාශයයේ ජල මට්ටම ඉහළයාමත් සමග දඹුල්ල වෑවලවැව ප්‍රධාන මාර්ගයේ වාහන ගමනාගමනය අද(12) සම්පුර්ණයෙන් නවතා දමා ඇතිබව දඹුල්ල පොලිසිය කියයි.
 
ඉහළ  ප්‍රදේශවලට මේ දිනවල ඇදහැලෙන වර්ෂාවත් සමඟ විශාල වශයෙන් ජලය අඩු වී තිබුණු කන්ඩලම ජලාශය පිරී මේ වන විට වාන් දැමීම සිදුවන අතර එහි අඩි දෙකකට ආසන්න ජල ප්‍රමාණයක් කුඩා තම්මන් ඇළ හරහා මිරිස්ගොනියා ඔයට මුදා හැරෙන බව මහවැලි නිලධාරීහු පවසති. 
 
කණ්ඩලම වැව වාන් දැමීමත් සමඟ විවිධ ප්‍රදේශවලින් පැමිණි බාල මහලු වැඩිහිටි බොහෝ දෙනෙකු වාන්  ජලයෙන් නෑම දිය කෙළියේ යෙදීම මෙන්ම වාන්  ජලය මතින් යතුරු පැදි සහ ත්‍රිරෝද රථ  ගමන් කිරීම  සම්පුර්ණයෙන් නවතා දැමීමට කටයුතු යොදා ඇතිබව මාතලේ දිස්ත්‍රික් පොලිස් ජීවිතාරක්ෂක ප්‍රධානි උප පොලිස් පරීක්ෂක සුනිල් විජේසිංහ මහතා පැවසීය.
 
මෙම ස්ථානයේ දිය නෑම සහ දියට බැසීම අනතුරුදායක ලෙස දැක්වෙන රතු පැහැති කොඩියක් ද පොලිස් ජීවිතාරක්ෂක නිලධාරීන් විසින් සවි කර තිබේ.
 
එමෙන්ම මාතලේ  පොලිස් ජීවිතාරක්ෂක නිලධාරීහු කිහිපදෙනෙකුම කණ්ඩලම වැවේ ස්ථාන කීපයක ජීවිත බේරා ගැනීමේ සේවයේ යොදවා ඇතිබව දඹුල්ල මුලස්ඨාන පොලිස් පරීක්ෂක එස් .පි .එදිරිසිංහ මහතා පැවසීය.