(ශාන්ත ප්‍රදීප් කුමාර කුලරත්න)

තවුහිත් ජමාත් සංවිධානයේ මතවාදය ප්‍රචාරණය කිරීම සඳහා  සකසා තිබූ සංයුක්ත තැටි තුනක්,විදේශ ගමන් බලපත්‍ර පහක් සමඟ පුද්ගලයන් දෙදෙනෙකු අත්අඩංගුවට ගත් බව ආමර් වීදිය පොලිසිය පවසයි.

ආමර් වීදියේ මහල් නිවාස සංකීර්ණයේ සැක කටයුතු පුද්ගලයින් රැඳී සිටින බවට ලද තොරතුරක් මත පොලිසිය එම ස්ථානයට ගොස් නිවස පරීක්ෂා කිරීමේදී සැකකරුවන් අත් අඩංගුවට ගැනීමට හැකි වූ බව පොලිසිය පවසයි.

ඒ අනුව නිවසේ   සඟවා තිබියදී තවුහිත් ජමාද් සංවිධානයේ මතවාදය ඇතුළත් සංයුක්ත තැටි තුනක් , ටැබ් පරිඝනකයක් ,ජංගම දුරකථන 12,විදේශ ගමන් බලපත්‍ර 05, සොයා ගැනීමට හැකි වූ බව කියයි.

මෙම විදේශ ගමන් බලපත්‍ර දෙකක් කාන්තාවන්ගෙ නමටද තුනක් පිරිමි පුද්ගලයින්ගේ නමටද නිකුත් කර ඇති අතර ඉන් දෙකක් අත්අඩංගුවට ගත් සැකකරුගේ නමට නිකුත් කර ඇති බවද පැවසේ.

පොලිස් භාරයට ගත් ජංගම දුරකථන දෙකේ තව්හිත් ජමාත් සංවිධානයේ ක්‍රියාකරකම් ඇතුළත් වීඩියෝ දර්ශන හා ඡායාරූප ඇතුළත්ව තිබූ බව පොලිසිය කියයි.

මොහොමඩ් සහරාන් නැමැත්තා මීට මාසයකට පෙර මෙම නිවසට පැමිණ ගොස් ඇති බවද පොලිසිය පවසයි.