(තිළිණි ද සිල්වා)

අග‍්‍රාමාත්‍ය රනිල් වික‍්‍රමසිංහ මහතාට ජනාධිපති පරීක්ෂණ කොමිසම හමුවේ සිකුරාදා  (18) පෙනී සිටින්නැයි  දන්වමින්  එම කොමිසම විසින් නොතිසී නිකුත් කරනු ලැබ ඇත.

මත්තල ජාත්‍යන්තර ගුවන්තොටුපළෙහි අංගණයක වී ගබඩා කිරීමෙන් රජයට පාඩු සිදුව ඇතැයි කියමින් ගොනු කර ඇති පැමිණිල්ලට අදාළව සාක්කි ලබා ගැනීම සඳහා කොමිසමේ සභාපති විශ‍්‍රාමික විනිසුරු උපාලි අබේරත්න මහතා විසින් මෙම නොතීසිය නිකුත් කළ බව එම ජනාධිපති කොමිසම පවසයි.

ඒ අනුව කොමිසන් සභා අඥා පනතේ 16 වැනි වගන්තිය යටතේ නීතීඥ නියෝජනයක් මඟින් හෝ තමන්ගේ අයිතිවාසිකම් වෙනුවන් පෙනී සිටින ලෙසට අද (15) දින කොමිසම අග‍්‍රාමාත්‍යවරයාට දැනුම් දුන්නේ යැයි එම කොමිසම නිවේදනයක් නිකුත් කරමින් කියා සිටී.

මීට අමතරව මෙම පැමිණිල්ලට අදාළව අමාත්‍ය දයා ගමගේ මහතාටද සිකුරාදා (18) දින කොමිසම හමුවේ පෙනී සිට සාක්කි ලබා දෙන ලෙසට කොමිසම නොතීසි නිකුත් තර ඇත.

තවද මෙම පැමිණිල්ලට අදාළව සාක්කි ලබා දීමට හෙට (16) දින කොමිසම හමුවේ පෙනී සිටින ලෙසට අග‍්‍රාමාත්‍ය ජ්‍යෙෂ්ඨ උපදේශක චරිත රත්වත්තේ සහ ශ්‍රී ලංකන් ගුවන් සේවයේ හිටපු සභාපති අජිත් ඩයස් මහතාට දැනුම් දී ඇත.

මත්තල ජාත්‍යන්තර ගුවන්තොටුපළෙහි අංගණයක වී ගබඩා කිරීමෙන් එයට සිදුව ඇති පාඩුව කොපමණදැයි ගණනය කිරීම සඳහා ජනාධිපති කොමිසම හමුවේ ඊයේ (14) සාක්කි දුන් එම ගුවන්තොටුපළේ කළමනාකරු නලීන් උපුල් ජයසූරිය මහතා ප‍්‍රකාශ කර ඇත්තේ ගුවන් තොටුපළේ අංගණයක වී ගබඩා කිරීම හේතුවෙන් එම අංගණයේ විදුලි පද්ධතියට සහ වායු සමීකරණ පද්ධතියට හානී සිදුව ඇති බවය.

තවද ගුවන් තොටුපළ ආරම්භ කළ අවදියේ ගුවන් යානා 22 ක් 23 ක් පමණ එම වකවානුවේ ගොඩ බැස්සවූ බවත් පසුව එය ක‍්‍රමයෙන් වැඩි වූ බවද කී එම ගුවන්තොටුපොළ කළමනාකරු වැඩිදුරටත් කොමිසම හමුවේ කියා සිටියේ මේවන විට මත්තල ගුවන් තොටුපළ ඉහළ අහසේ දිනකට ගුවන් යානා 300ක් පමණ ශ්‍රී ලංකාව හරහා යන බවද කියා සිටියේය.

ඒ සෑම ගුවන් යානයක්ම ඩොලර් 250 කට ආසන්න මුදලක් වශයෙන් දිනකට ඩොලර් 5000ක් පමණ ශ්‍රී ලංකා රජයට ලැබෙන බවද මත්තල ගුවන්තොටුපළ කළමනාකරුවරයා කොමිසම හමුවේ සාක්කි දෙමින් කියා සිටියේය.