(ඩයනා උදයංගනී)

ගුරුවරුන්ට සහ පාසල් සිසුන්ට කොවිඩ් ප්‍රතිශක්තීකරණ එන්නත් ලබාදීම සම්බන්ධයෙන් රජයේ අවධානය යොමු වී ඇති අතර මෙහිදී ගුරුවරුන්ට අවශ්‍ය එන්නත් ලබාගැනීම සෞඛ්‍ය අමාත්‍යාංශය හරහා ඉටු කර ගත හැකි බව අග්‍රාමාත්‍ය මහින්ද රාජපක්‍ෂ මහතා ඉකුත් දා පැවසීය.

කොවිඩ්-19 වසංගතය හේතුවෙන් වසා දමා ඇති පාසල් නැවත ආරම්භ කරන විට දරුවන්ගේ රෝග සහ ගැටලු හඳුනා ගැනීම සඳහා ළමා  රෝග විශේෂඥ වෛද්‍යවරුන්ගේ සහය ද ලබාගන්නැයි අග්‍රාමාත්‍ය මහින්ද රාජපක්ෂ මහතා අධ්‍යාපන බලධාරීන්ට උපදෙස් දුන්නේය.

අග්‍රාමාත්‍යවරයා මේ බව සඳහන් කළේ පාසල් නැවත විවෘත කිරීම සහ ගුරුවරුන්ට හා සිසුන්ට කොවිඩ් ප්‍රතිශක්තීකරණ එන්නත් ලබාදීම සම්බන්ධයෙන් අරලියගහ මන්දිරයේ දී පැවති සාකච්ඡාවකදීය.

 කොවිඩ් වසංගත තත්ත්වය පාලනය වූ වහාම අදියර කිහිපයක් යටතේ පාසල් නැවත ආරම්භ කළ යුතු බව කී අග්‍රාමාත්‍ය මහින්ද රාජපක්‍ෂ මහතා රටේ අනාගත දරු පරපුර මෙන්ම ඔවුන්ට මග පෙන්වන ගුරුවරු ආරක්ෂා කර ගැනීමට රජය සෑම විටම කටයුතු කරන බව සඳහන් කළේය.

පාසල් ආරම්භ කිරීමේ දී දරුවන් සහ ගුරුවරුන් ආරක්ෂීත ක්‍රවේදයක් ඔස්සේ පාසලට කැදවාගැනීම සඳහා වැඩපිළිවෙලක් සකස් විය යුතු බව ද අග්‍රාමාත්‍ය මහින්ද රාජපක්‍ෂ මහතා පැවසීය.

පාසල් ළමුන් ප්‍රවාහනය කිරීමේදී අනුගමනය කළ යුතු සෞඛ්‍යාරක්ෂිත ක්‍රමවේද පිළිබඳව විශේෂ අවධානයක් යොමුකරන්නැයි ද අග්‍රාමාත්‍යවරයා අදාළ බලධාරීන්ට උපදෙස් දුන්නේය.

මෙහිදී අදහස් දැක්වූ අධ්‍යාපන අමාත්‍යාංශයේ ලේකම් මහාචාර්ය කපිල පෙරේරා මහතා පැවසුවේ පාසල් නැවත ආරම්භ කිරීමට අදාළව එන්නත්කරණ වැඩපිළිවෙලක් ක්‍රියාත්මක වන්නේ නම් 11 හා 13 ශ්‍රේණිවල දරුවන්ට ප්‍රමුඛතාවය දිය යුතු බවයි.

මෙම කටයුත්ත සාර්ථක කරගැනීම සඳහා දෙලක්ෂ හැත්තෑ නව දහසක් පමණ වන ගුරුවරුන්, අධ්‍යනයන කාර්ය මණ්ඩලය ඇතුළු ලක්ෂ තුනකට ආසන්න පිරිසට එන්නත් ලබාදීම වැදගත් බවද මහාචාර්ය කපිල පෙරේරා මහතා සඳහන් කළේය.