(නිමන්ති රණසිංහ)

මහරගම නගර සභාවේ පාලක පක්ෂය නියෝජනය කරන මන්තී‍්‍ර රසිකා ගුණසිංහ මහත්මියට බැන තර්ජනය කර පහරදුන්නැයි එම සභාවේ සමගි ජන බලවේගයේ මන්තී‍්‍රනි ඉනෝජා මුණසිංහ මහත්මිය රුපියල් ලක්ෂ 2ක ශරීර ඇපයක් මත මුදා හැරීමට නුගේගොඩ මහේස්ත‍්‍රාත් ප‍්‍රසන්න අල්විස් මහතා නියෝග කළේය.

මෙම සිද්ධියට අදාළව සැකකාර මන්තී‍්‍රවරිය මහරගම පොලීසිය විසින් අත්අඩංගුවට ගෙන අධිකරණයට ඉදිරිපත් කරනු ලැබු අවස්ථාවේදී මෙම නියෝගය නිකුත් විණී.

මහරගම ප‍්‍රාදේශීය සභාවේ උප සභාපතිවරයකුව සිටි කරෝලිස් රාජපක්ෂ මහතාගේ දේහයට අවසන් ගෞරවය දැක්වීම සඳහා එම දේහය ඉකුත් 15 වැනිදා නගර සභාවේ ශ‍්‍රවනාගාරයේ තැන්පත් කර තිබූ අවස්ථාවේදී එයට ගෞරව දැක්වීමට පැමිණ සිටි මෙම සැකකාර මන්ති‍්‍රවරිය, සිද්ධියේ පැමිණීලිකාර මන්තී‍්‍රවරියට බැන තර්ජනයකර පහරදී ඇතැයි මහරගම පොලීසිය අධිකරණයට කරුණු වාර්තා කර තිබිණී.

මෙම සිද්ධිය සම්බන්ධයෙන් පැමිණීලි කළ නාගරික මන්තී‍්‍රවරිය ගැබිනියක් වන බවත් සිද්ධියෙන් පසු ඇය තවමත් ජයවර්ධනපුර රෝහලේ ප‍්‍රතිකාර ලබමින් සිටින බවත් මහරගම පොලිසිය අධිකරණයට කරුනු ඉදිරිපත් කළේය.