(ක.ග.කරුණාරත්න)
 
වසර දෙකකට පමණ පෙර පිටරටින් ගෙන්වූ සහල් කිලෝ 350,000කට අධික තොගයක් වෙළඳපොළට නිකුත් නොකර හිඟුරක්ගොඩ සතොසට අයත් ගබඩා සංකීර්ණයක කල්ඉකුත්වීම සඳහා ගොඩගසා ඇති බව සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න මහතා අද(30) ප‍්‍රකාශ කළේය.
 
එම සම්මේලනයේ ලේකම් ටී.බී.සරත්මහතා ඇතුළු පිරිසක් අද ඒ සහල් ගබඩා පරීක්ෂා කරබැලීමෙන් පසුව මාධ්‍යට අදහස් දක්වමින් එසේ පැවැසීය.
 
මේ වනවිට එම සහල් සත්ව ආහාර ලේබලය යටතේ කුණුකොල්ලයට විකුණා දමමින් තිබෙන බව පැවැසූ කරුණාරත්න මහතා මෝල්හිමියන් ඒ සහල් නැවත වෙළඳපොළට නිකුත් කරන්නේද යන්න සැකයක් මතුවන බව කීය.
 
“මේ හාල් ගෙනත් තියෙන්නේ 2017 සැප්තැම්බර් මාසයේ. 2019 අගොස්තු පළමුවෙනිදා වෙනකම් මේ හාල් පරිභෝජනය කරන්න පුළුවන් කියලා නිර්දේශ කරලා තිබුණා. හැබැයි අවුරුදු දෙකක කාලයක් ගියා. අවුරුදු දෙකක් යනකම් මේ හාල් ගොඩ ගහලා සත්ව ආහාර දක්වා කල් ඉකුත් වෙනකල් තියාගෙන හිටියේ ඇයි?
 
2017 අවුරුද්දේ අපිට හාල් ඇටයක්වත් පිටරටින් ගේන්න උවමනාවක් තිබුණේ නෑ. දැවැන්ත වී නිෂ්පානයක් තිබුනා. අපට වී මෙට්‍රික් ටොන් 36ක් තමයි අවුරුද්දටම අවශ්‍ය වෙන්නේ. නමුත් ලක්‍ෂ 45ත් 50ත් අතර අපි වාර්ෂිකව නිෂ්පාදනය කරනවා. හැම අවුරුද්දක්ම අපි පටන් ගන්නේ වී මෙට්‍රික් ටොන් ලක්‍ෂ 10කට වැඩි ප‍්‍රමාණයක් එක්ක. මේ තත්වය තුළ හාල් පිටරටින් ගේන්න උවමනාවක් නැතුව තිබියදී සල්ලි වියදම් කරලා මේවගේ හාල් තොගයක් ගෙනාවේ මොකටද? ඒ හාල් ගොඩගහලා තියාගෙන සත්ව ආහාර දක්වා කුණුකොල්ලයට විකුණන තැනට පත්කෙරුවේ ඇයි? 

මේ හාල් සත්ව ආහාර ලේබල් එක යටතේ ගිහිල්ලා ඊටපස්සේ මෝල්වලින් නැවත මේවා පොලිෂ් වෙලා නැවතත් එනවා ජනතාවගේ පරිභෝජනයට එනවා කියලා අපි සැකකරනවා.
 
මේ ආණ්ඩුව ආවට පස්සේ රජයේ වී තොග ගත්ත මිලට, රුපියල් 38ක් වාගේ ගත්ත මිලට මෝල් හිමියන්ට නිකුත් කරලා තිබෙනවා. ඒ වී මෝල් හිමියෝ කොමිස් තියාගෙන නැවත විකුණලා තියෙනවා. ඒ අනුව එම හිලව්වට මේ හාල්ම නැවත පොලිෂ්වෙලා එන්නත් ඉඩ තියෙනවා. කොහොම නමුත් සත්ව ආහාරයට මේවා ගියාට නැවතත්  මහජනයාගේ පරිභෝජනයට එන ඉඩකඩ වැඩියි.
 
කන්න නැතුව දරුවෝ බඩගින්නේ අඬනවා රූපවාහිනී නාලිකාවල පෙන්නවා. බඩඉරිඟු ඇටකනවා. සමහර දරුවෝ කියනවා වේල් දෙකකින් කෑවේ නෑ කියලා. ඊයේ ඉඳලා අද වෙනකල් කන්න මොකුත් නෑ කියනවා. බඩගෙඩිය පිටපැත්තට ඇලිච්ච මන්දපෝෂණයෙන් පෙලෙන දරු පැටව් ඉන්න ජනතාවක් ඉන්න රටක ජනතාවගේ බදු මුදල්වලින් මේ විදියට හාල් ගෙනැල්ලා පිස්සු නටන්න පාලකයින්ට ඉඩදෙන්න බෑ.
 
මේකේ මූලික වග උත්තරකරු පහුගිය ආණ්ඩුවයි. පහුගිය ආණ්ඩුව යටතේ තමයි මේ හාල් තොග ගෙනාවේ. ගෝඨාභය ජනාධිපතිතුමාට අපි කියනවා මේ ගැන නිසික‍්‍රියා මාර්ගය ගන්න කියලා. මේ හාල් තොග තිබෙන්නේ ඔබතුමාලගේ රජයේ ආයතනයක් යටතේ. මේක සතොසේ වැරැද්දක් නෙවෙයි. තැන් තැන්වල තිබුණු හාල් තොග තමයි මේ ගෙනැල්ලා ගොඩ ගහලා තියෙන්නේ. මේකට අදාල වගඋත්තරකරුවන්ට වහාම ක‍්‍රියා මාර්ග ගන්න කියලා අපි ආණ්ඩුවට බල කරනවා” යැයිද නාමල් කරුණාරත්න මහතා ප‍්‍රකාශ කළේය.