( සිතුම් චතුරංග)

කිලිනොච්චිය , පලෙයි ප්‍රදේශයේ රාත්‍රී ආපන ශාලාවකට ඇතුල්වූ  පිරිසක් එම ආපන ශාලාවේ රැදී සිටිමින් ආහාරගත් පිරිසට හා ආපන ශාලාවේ මුදල් අයකැමිට  පහරදෙන වීඩියෝවක් මේ දිනවල සමාජ ජාලා වෙබ් අඩවිවල සංසරණය වෙමින් පවතී.

පසුගිය 24 වැනිදා පොලු රැගෙන කඩාවැදුණු පිරිසක් ආපන ශාලාවේ රැදී සිටි පිරිස වෙත එලෙස පහරදී ඇති අතර මුදල් අයකැමිවරයා හට පහරදෙන අයුරු ආපන ශාලාවේ සී.සී.ටී.වී දර්ශනවල පටිගතවී තිබේ.

ආපන ශාලාවේ ආහාර ගැනීමට පැමිණි පුද්ගලයින් එලවා දමමින් මෙම පහරදීම සිදුකොට ඇති අයුරු වීඩියෝ දර්ශනවල දැක්වේ.

සිද්ධිය සම්බන්ධයෙන් ආපන ශාලාවේ රැදී සිටි පුද්ගලයකු පවසා සිටියේ කිලිනොච්චිය ප්‍රදේශයේ උසස් පොලිස් නිලධාරියකු බීමත්ව ආපන ශාලාවට තවත් නිලධාරීන් පිරිසක් සමඟින් සිවිල් ඇඳුමින් කඩාවැදී එහි සේවකයින්ට පහරදුන් බවයි.

මුව ආවරණ නොපැළඳ සිටි බවට පවසමින් එලෙස පහරදුන් බවත් ආපන ශාලාවේ රැදී සිටි බහුතරයක් මුව ආවරණ පැළද සේවය කරමින් සිටි බවත් වෙනත් කාරණාවක් හේතුවෙන් උරණවී මෙම පහරදීම සිදුකොට ඇති බවද පැවසීය.

සිද්ධිය සම්බන්ධයෙන් කිලිනොච්චිය කොට්ඨාස භාර ජ්‍යෙෂ්ඨ පොලිස් අධිකාරී සී.බි.මැදවල මහතාගෙන් විමසීමේදී ඔහු පවසා සිටියේ පලෙයි ප්‍රදේශයේ සිදුවීම සම්බන්ධව සමාජ ජාලාවල හුවමාරුවන වීඩියෝව සම්බන්ධයෙන් තමන් දැණුවත් නොමැති බවත් සිද්ධිය පිළිබඳ මෙතෙක් පැමිණිල්ලක් ලැබී නොමැති අතර එ පිළිබද සොයාබලන බවත්ය.