(සිතුම් චතුරංග, ප්‍රදීප් කුමාර සහ රොමේෂ් මධුශංක)
           
කොරෝනා වෛරසය ආසාධනය වී ඇති බවට සැකකරන තරුණියක වවුනියාව මහ රෝහලට ඇතුළත් කිරීමෙන් අනතුරුව යාපනය  ශික්ෂණ රෝහල වෙත මාරුකර යැවූ බව  වවුනියාව මහ රෝහලේ අධ්‍යක්ෂ  වෛද්‍ය එස්. නන්දකුමාර් මහතා පැවසීය.
 
වවුනියාව පදිංචි 24 හැවිරිදි තරුණියක වන ඇය චීනයේ සිට පසුගියදා මෙරටට පැමිණ ඇති බව අනාවරණය වී ඇත.
           
උණ රෝගය හේතුවෙන් තරුණිය වවුනියාව රෝහලට ඇතුළත්ව ඇති අතර ඇය පිළිබඳ පරීක්ෂා කිරීමේදී කොරෝනා වයිරසය යැයි පළ වූ සැකය මත ඊයේ දිනයේදී යාපනය ශික්ෂණ රෝහල වෙත මාරුකර යැවූ බවද  ඒ මහතා සඳහන් කළේය.
           
කොරෝනා වයිරසය සඳහා යාපනය ශික්ෂණ රෝහලේ මේ වන විට පහසුකම් සලසා ඇති බවද ඔහු පැවසීය.
           
රෝගී තරුණියට කොරෝනා වයිරසය ආසාධනය වී ඇති බවට තවමත් අනාවරණය නොවූ බවත්, රෝගය ව්‍යාප්තවීම වැළැක්වීම සඳහා ඉදිරි වෛද්‍ය වාර්තා අනුව ක්‍රියාකරන බවත් වවුනියාව රෝහලේ අධ්‍යක්ෂවරයා වැඩිදුරටත් පැවසීය.
 
මේ වන විට යාපනය ශික්ෂණ රෝහලේ අංග සම්පූර්ණ පහසුකම්වලින් යුත් වෙනම විශේෂිත වූ වාට්ටුවක් වෙන් කර ඇති බවද, උණ සහ සෙම්ප්‍රතිශ්‍යාව ඇති ඕනෑම අයකුට රෝහලට පැමිණ පරීක්ෂා කරගත හැකි බවද, වයිසරයෙන් ආරක්ෂා වීම සඳහා පහසුකම් සපයා ඇති බවද යාපනය ශික්ෂණ රෝහලේ අධ්‍යක්ෂක වෛද්‍ය ටී.සත්‍යමූර්ති මහතා සහා නියෝජ්‍ය අධ්‍යක්ෂක වෛද්‍ය ජමුනානන්දන් මහතා කීය.