(පුෂ්පකුමාර මල්ලවආරච්චි සහ තිලකරත්න දිසානායක) 

කෘෘඩියා සෙලනිකා වැනි විශාල මුල් පද්ධතියක් සහිත විශාල ගසක් වෙනත් තැනක සිටුවීම දැඩි අවධානම් සහගත ක්‍රියාවක් බවත්,  වනජීවී අධ්‍යක්ෂ ජනරාල්වරයා එම තීරණය ගත්තේ ස්ථාන පරීක්ෂණයකින්දැයි විමසා බැලිය යුතු බවත් වන ජීවි හා වන සංරක්ෂණ අමාත්‍යාංශයේ ලේකම් එම්. කේ. බන්දුල හරිශ්චන්ද්‍ර මහතා ගම්පහ  දාරළුව දී අද(9) පැවසීය. 

ලේකම්වරයා මේ බව සඳහන් කළේ මධ්‍යම අධිවේගී මාර්ගය ඉදිකිරීම හේතුවෙන් ඉවත් කිරීමට යෝජිත කෲඩියා සෙලනිකා නැමැති  ගස නිරීක්ෂණයට පැමිණි අවස්ථාවේදීය. ගම්පහ දිස්ත්‍රික් ලේකම් සුනිල් ජයලත් මහතා ඇතුළු නිලධාරීන් සමග පැමිණි ලේකම්වරයා අධිවේගී මාර්ගය ඉදිකිරීම සීමාවේ පිහිටි ගස නිරීක්ෂණය කළේය.

මෙම වටිනා ගස රැක ගැනීම සඳහා යෝජිත මාර්ගය වෙනස් කිරීමට බැරිද බැරි හේතු මොනවාදැයි ලේකම්වරයා මාර්ග සංවර්ධන අධිකාරියේ නිලධාරීන්ගෙන් විමසීය. ලෝකයේ වෙනස් කරන්න බැරි දෙයක් නැහැ යි පැවසූ ලේකම්වරයා මාර්ගය කුළුණු මත ඉදි කිරීමේ හැකියාවක් ඇත්දැයි විමසීය. 

මෙම ශාකය ආරක්ෂිත ශාකයක් වීමත් සමස්ත රටේම  ගස් කිහිපයක් පමණක් පැවතීමත් හේතුවෙන් මෙහි ඇති වැදගත්කම වඩාත් ඉස්මතු වන බව සඳහන් කළ ලේකම්වරයා එවැනි තත්ත්වයක් තුළ මේ ගස ආරක්ෂා කිරීමේ වගකීමක් වන ජීවී වනජීවී දෙපාර්තමේන්තුවට ඇතැයිද සඳහන් කළේය. රටක් වශයෙන් විදේශීය උදව් උපකාර ලබා ගන්නා අවස්ථාවන්හිදී අපි පාරිසරික සංරක්ෂණයට ඉඩ දී ඇත්දැයි සොයා බලන බවද සිහිපත් කළ ලේකම්වරයා  මේ සම්බන්ධයෙන්  සොයාබලා කාලීන විසඳුමක්  සොයා ගැනීම අත්‍යවශ්‍ය බව අවධාරණය කළේය.

මෙම ශාකයේ වටිනාකම හේතුවෙන් උද්භිද උද්‍යාන දෙපාර්තමේන්තුවට දැනුම් දී පටක රෝපණය මගින් පැළ ලබා ගෙන රටේ විවිධ පෙදෙස්වල වගා කිරීමටත් ජනතාවට ලබා දීමටත් අවශ්‍ය පියවර ගත යුතු බව සඳහන් කළ ලේකම්වරයා අදම ඒ සම්බන්ධයෙන් ක්‍රියාත්මක වන බවද කීය. මෙම වර්ගයේ තවත් ගසක් මගලෙගොඩ ප්‍රදේශයේ ඇති බවට දැනගන්නට ඇතැයි ද ලේකම්වරයා සඳහන් කළේය. මෙම ශාකය මැදිකර අධිවේගී මාර්ගය ගස දෙපැත්තෙන් යැවීමට හැකියාවක් ඇත්දැයි සොයා බලන ලෙසද  ලේකම්වරයා මාර්ග සංවර්ධන අධිකාරියේ නිලධාරීන්ගෙන් ඉල්ලීමක් කළේය. අනාගතය ගැන සිතා මේ සම්බන්ධයෙන් තීරණයක් ගත යුතු යැයි ද මෙම ගස අනාගතයේදී ලොකු වටිනාකමක් ඇති වනු ඇතැයි ද හරිශ්චන්ද්‍ර මහතා සඳහන් කළේය.

තමන් අමාත්‍යාංශ ලේකම්වරයා වශයෙන් පරිසරය ඇතුළු හැම දෙයක්ම රැකෙන හොඳම තීරණය ගන්නා බවත් එය සුදුසු වේලාවේදී කියන  බවත් ඒ සම්බන්ධයෙන් රජයට කරුණු ඉදිරිපත් කරන බවද බන්දුල හරිශ්චන්ද්‍ර මහතා මෙහිදී සඳහන් කළේය. 

ගම්පහ දිස්ත්‍රික් ලේකම්  සුනිල් ජයලත් මහතා මෙහිදී සඳහන් කළේ ඔහුගේ උවමනාව  ගසත් ආරක්ෂා කරගෙන සංවර්ධන කටයුතු සිද්ධ කිරීම බවයි. 

ලේකම්වරයා ඇතුළු නිලධාරී පිරිස ගස පසුබිම සිටින සේ ඡායාරූපයක් ලබා ගන්නා අවස්ථාවේදී ප්‍රදේශ වාසියකු ඔවුනට විරුද්ධත්වය පළ කරමින් ගත වූ වසර දෙකක කාලය තුළ වාහන තුන් හාරසීයකින් නිලධාරීන් පැමිණ පරීක්ෂාකර ගියත් මෙතෙක් කිසිදු පලක්වී නැතැයි ද අද පැමිණි නිලධාරින්ගෙන්ද ප්‍රයෝජනයක් නොවන බවට චෝදනා කළේය. ඔහු රාජකාරියට බාධා කිරීම සම්බන්ධයෙන් පියවර ගන්නා බවට  දිසාපතිවරයා ප්‍රකාශ කරමින් ඔහු පිළිබඳ විස්තර ලබා දෙන ලෙස ග්‍රාම නිලධාරීට දැන්වීය. 

කැලණිය විශ්වවිද්‍යාලයේ සිනමා හා රූපවාහිනි අංශයේ මහාචාර්ය පැට්‍රික් රත්නායක, අත්තනගල්ල ප්‍රාදේශීය සභාපති ප්‍රියන්ත පුෂ්පකුමාර මහතා ඇතුළු පිරිසක් ද මේ පිරිසක්ද මේ ස්ථානයට වරින්වර පැමිණියහ.