(ඩී.ජී.සුගතපාල)
 
බූස්ස බන්ධනාගාරයේ රඳවා සිටින පාතාල නායකයකු වන කංජිපානි ඉම්රාන්ට ආහාර බඳුනක සඟවා ජංගම දුරකතන දෙකක් සහ චාජර දීමට තැත්කිරීම සම්බන්ධයෙන් අත්අඩංගුවට ගෙන අධිකරණයට ඉදිරිපත් කළ සැකකරුවන්  හය දෙනා සැප්තැම්බර් 25 දක්වා රිමාන්ඩ් බන්ධනාගාර ගත කිරීමට ගාල්ල ප්‍රධාන මහේස්ත්‍රාත් හර්ෂණ කැකුණවෙල මහතා අද(13)නියෝග කළේය.
 
මෙසේ රිමාන්ඩ් බන්ධනාගාරගත කරනු ලැබුවේ කංජිපානි ඉම්රාන්ගේ පියා වන මොහොමඩ් ඉම්රාන් මොහොමඩ් නසීම්(65)සද්ධර්ම මාවත කොළඹ 10, මොහොමඩ් නසිම් අබ්දුල් ෆාසිස්(28), මොහොමඩ් කුකුබ්දින් මොහොමඩ් වසිම්දීන්(28), මොහොමඩ් ඉස්තිකාර් මොහොමඩ් සෆ්රාස්(23), මොහොමඩ් ඉල්හාම් මොහොමඩ් අෆ්රිඩින් (28) මොහොමඩ් සරූක් මොහොමඩ් ෆායිස් යන සැකකරුවන් හය දෙනාය.
 
ඊයේ (12) පවත්වන ලද සිරකරු සුබ සාධක  දිනය නිමිත්තෙන් රැඳවියන් බැලීමට පැමිණි කංජිපානිගේ පියා, සහෝදරයා සහ ඇතුළු සැකකාර ඥාතීන් සිව්දෙනා රැගෙන ආ ආහාර බඳුනේ  පතුලේ සඟවා තිබූ ජංගම දුරකතන දෙකක්, සිම්පත් දෙකක් සහ චාජර  බන්ධනාගාර නිලධාරීන් සොයාගෙන තිබිණි.

කංජිපානි ඉම්රාන් ගංජා ළඟ තබා ගැනීමේ චෝදනාවට වරදකරු වී  කොළඹ මහාධිකරණය විසින් බරපතල වැඩ සහිත  වසර හයක සිර දඬුවම් නියම වී සිටින්නෙකි.

රත්ගම පොලිසියේ අපරාධ විමර්ශන අංශයේ පොලිස් පරික්ෂක ධම්මික නාගහවත්ත මහතා සමග සැරයන් දේවසිංහ (17205)මහතා විසින් සැකකරුවන් අධිකරණයට ඉදිරිපත් කරන ලදී.